Тошкент ва Самарқандда Пётр Герцен номидаги Москва онкология илмий-тадқиқот институтининг филиаллари очилади. ЎзАнинг хабар қилишича, Россия онкологлари гуруҳи делегациясининг Ўзбекистонга ташрифи жараёнида бу ҳақдаги келишувга эришилди.
Делегация Республика ихтисослашган онкология ва тиббий радиология илмий-амалий тиббиёт маркази ҳамда унинг Тошкентдаги филиали фаолияти билан танишди.
Ўзбекистон ва россиялик ҳамкасблар ординатура, аспирантура ҳамда докторантура орқали етук онколог ва радиолог шифокорларни тайёрлаш, радиотерапия бўлимларида ишлаш учун тиббий физик мутахассисларни етиштириш, онкологларнинг Россия клиникаларида стажировкасини ташкил этиш орқали юқори малакали кадрлар тайёрлаш бўйича қатор қўшма лойиҳаларни муҳокама қилдилар. Бу борада Пётр Герцен номидаги Москва онкология илмий-тадқиқот институти ўзбек ҳамкасблари учун ўқишни бепул ташкил этишга тайёр эканлигини билдирди.
Мулоқот чоғида Тошкент ва Самарқанд шаҳарларида Пётр Герцен номидаги Москва онкология илмий-тадқиқот институти филиалларини очишга келишиб олинди.Бундан ташқари, илм-фан, телемедицина бўйича ҳафталик анжуманларни ташкил этиш, етакчи онколог-жарроҳлар билан биргаликда маҳорат дарслар ўтказиш, шунингдек, қўшма конференция, конгрес ва симпозиумларни мунтазам ўтказиш масалалари муҳокама қилинди.
