«Оскар» мукофотининг 91-тақдирлаш маросимида «Яшил китоб» картинаси иккита статуэткани — энг яхши фильм ва оригинал сценарий йўналишлари бўйича қўлга киритди. Фильмда пианиночи Дон Ширли ролини ижро этган Маҳершала Али «Энг яхши иккинчи даражали эркак роли» совринига сазовор бўлди, дейилади киносоврин сайтида.
Тақдирлаш маросими 24 февраль куни Лос-Анжелесда бўлиб бўлди. Номзодлар эса 22 январь куни эълон қилинган эди.
Мексикалик Альфонсо Куарон «Оскар» тарихида бир фильмдаги режиссёрлик ва операторлик иши учун совриндор бўлган илк инсонга айланди. Унинг «Рома» картинаси эса «Чет тилидаги энг яхши фильм» номинациясида ғолиб бўлди.
Фантастик йўналишдаги «Қора қоплон» учта йўналиш: энг яхши костюм дизайни, оригинал саундтрек ва постановкачи рассмо иши йўналишларида ғолиб бўлди. Хонанда Леди Гага эса Брэдли Купернинг «Юлдуз туғилди» фильмидаги Shallow қўшиғи учун тақдирланди.
«Богемия рапсодияси» картинасидаги Фредди Меркьюри ролини ижро этган Рами Малек энг яхши эркак актёрга аталган совринга эга бўлди. «Фаворит» фильмидаги ижроси учун Оливия Колман энг яхши актриса бўлди.
Барча ғолиб ва совриндорлар рўйхати киносоврин сайтида мавжуд.
Америка кинематография ва санъат ҳамда илмий академиясининг соврини, 1940 йилдан «Оскар» номини олган соврин кинони яратишда ҳисса қўшган шахсларга топширилади. Тақдирлаш маросими ҳар йили ўнлаб давлатга жонли тарзда узатилади.
