Бугун, 23 январь куни Миллий олимпия қўмитасида Ўзбекистон олимпия терма жамоаси бош мураббийлиги учун номзод бўлиб турган сербиялик мураббий Любинко Друлович билан расман шартнома имзолаш маросими ташкил қилинди. Бу ҳақда МОҚ матбуот хизмати хабар берди.
Унда Ўзбекистон Миллий олимпия қўмитаси президенти ва Ўзбекистон футбол ассоциациясининг биринчи вице-президенти Умид Аҳмаджонов, мураббий Любинко Друлович ва унинг ёрдамчилари, ЎФА мутасаддилари иштирок этишди.
«Ўзбекистон футболига хуш келибсиз. Бизнинг асосий мақсадимиз Токио-2020 олимпиадасига йўлланма олишдир. Бу йўлда терма жамоамиз учун барча шароитлар яратилади. Сизга мураббийлар штабида ўзбекистонлик мутахассис Равшан Ҳайдаров ёрдам беради. Чунки, у ушбу таркибдаги футболчиларни яқиндан билади», — деди Умид Аҳмаджонов.
Ўз навбатида сербиялик мураббий билдирилган ишонч учун миннатдорчилик билдирди ва ўз олдига қўйилаётган вазифани бажариш учун астойдил меҳнат қилишини таъкидлаб ўтди.
«Авваламбор менга билдирилаётган ишонч учун ўзим ва ёрдамчиларим номидан раҳмат айтаман. Биз биргаликда ҳаракат қилиб, Токио олимпиадасига бора оламиз. Умид қиламанки, ҳамкорлигимиз самарали бўлади», — деди Друлович.
Шундан сўнг томонлар расман шартнома имзоладилар. Маросим якунида мураббий учун эсдалик либоси тақдим этилди.
Янги мураббий билан келишув Токио-2020 олимпиадасига қадар амал қилади.
Маълумот учун:
Любинко Друлович
Фуқаролиги: Сербия
Туғилган санаси: 11 Сентябрь 1968 (50 ёш)
Мураббийлик даражаси: УЕФА «ПРО» дипломи эгаси (2007 йил)
Энг катта ютуғи: Сербия U-19 терма жамоаси билан Европа чемпионатида ғолибликка эришган.
Мураббий сифатида эришган ютуқлари:
1. Ангола Суперкубоги Ғолиби — «Агосто» ФК 2010−2011
2. Европа U-19 Чемпионати ғолиби — Сербия 2013
3. «Партизан» ФК билан Европа лигаси иштирокчиси — 2015−2016
4. БАА U-19 билан финал қисмига йўл олган — 2017 йил.
Шахсий ютуқлари:
Сербияда йилнинг энг яхши мураббийи — 2013 йил.
