АҚШнинг Атлантик-Сити шаҳрида бўлиб ўтган профессионал бокс оқшомида уч нафар ўзбекистонлик боксчилар рингга кўтарилди ва уччаласи ҳам рақибларини муддатидан аввал мағлубиятга учратди. Бу ҳақда ЎзА хабар қилди.
Оқшом жангларида ўзбекистонлик боксчилардан биринчи бўлиб бухоролик Шаҳрам Ғиёсов рингга кўтарилди. Шу кунгача профессионал боксда бешта жанг ўтказиб, унинг тўрттасида муддатидан олдин ютуқни қўлга киритганди. Мексикалик Мигель Замудиога қарши бу галги рейтинг жанги ҳам Ўзбекистон вакилининг тўла устунлигида ўтди.
Шаҳрам саккиз раундга мўлжалланган жангнинг биринчи раундидаёқ рақибини нокаутга учратди. Шаҳрамнинг зарбаларидан ўзига кела олмаган ва икки бор вақт чўзилмаганлигини инобатга олмаганда биринчи раунднинг 47-сониясида бош ҳакам жангни тўхтатишга мажбур бўлди. Шу тариқа Шаҳрам Ғиёсов фаолиятидаги олтинчи ғалабасини тантана қилди.
Жанг видеоси
Профессионал боксдаги дебютини нишонлаган Исроил Мадримов чемпионлик камари учун мексикалик Владимир Эрнандесга қарши рингга кўтарилади ва тинимсиз устунлигига қарамай олтинчи раунда рақибини таслим эта олди. Исроил профессионал рингдаги илк жангини мексикалик Владимир Эрнандесга қарши ўтказди.
10 раундга мўлжалланган жангнинг олтинчи раундида ўзбек спортчиси рақибини нокаутга учратди ва проф рингдаги фаолиятини ғалаба билан бошлади. Боксчи ушбу ғалаба орқали дебют жангидаёқ WBA Intercontinental камарига эга чиқди. Исроилнинг рақиби ҳам анча тажрибали ҳисобланади. Эрнандес проф боксда 13 та жанг ўтказиб, 10 тасида ғалаба қозонган. Олтита жангда рақибларини нокаутга учратган. Мадримовга қарши жангда у учинчи мағлубиятини қабул қилиб олди.
Жанг видеоси
Муроджон Аҳмадалиев эса ўзига тегишли бўлган WBA International чемпионлик камарини америкалик Исаак Заратедан ҳимоя қилди.
Олимпия ўйинлари ва жаҳон чемпионати совриндори, Осиё чемпиони Муроджон Аҳмадалиев профессионал боксдаги бешинчи жангини ҳам кўтаринки руҳда ўтказди ва кутилганидек у ҳам ғалабасини нишонлади. 10 раундга мўлжалланган жангнинг барча раундларини фаол ўтказган Муроджон тўққизинчи раундга келиб рақибини нокаутга учратди.
Аҳмадалиев профессионал фаолияти давомида бугунгиси билан қўшиб ҳисоблаганда беш маротаба рингга чиққан ва уларнинг барчасида ғалаба қозонган. Жангларининг тўрттасини нокаут эвазига ўз фойдасига ҳал қилган. Унинг бугунги рақиби Зарате эса 23 та жанг ўтказиб, 16 та ғалабага эришган. Учта жангда дуранг қайд этилган ва яна 4 та баҳсда мағлубиятга учраган.
Жанг видеоси
