4 октябрь куни Тошкентнинг Учтепа туманидаги Al Hilol кафеси яқинида ҳайдовчини калтаклаганликда гумон қилинган шахслар ушланди. пойтахт прокуратураси иш назоратини ўз қўлига олди, дея хабар қилди маҳкама «Газета.uz"га.
Можаро акс этган видеоёзув ижтимоий тармоқларда эълон қилинди. Унда икки йигит учинчи бир шахсни калтаклагани тасвирланган. Жанжал жабрланувчи, рақибларининг фикрича, ўз автомобилини уларнинг машинасига жуда яқин жойлаштиргани сабаб бўлган.
Тошкент ИИББ маълумотларига кўра, гумонланувчилар Дониёр А. (1994 й. т.) ва Анваржон Р. (1985 й. т.) бўлиб, уларнинг иккинчиси муқаддам судланган.
Уларга нисбатан 16 октябрь куни Ўзбекистон Жиноят кодексининг 277- модда 2-қисм «а» ва «б» бандлари билан жиноий иш қўзғатилган. Тергов тадбирлари олиб борилмоқда.
Ўтказилган суд-тиббий экспертизаси хулосасига кўра, жабрланувчи Достон Ш. (1993 й. т.) саломатлигининг бузилишига олиб келган ўрта оғирликдаги тан жароҳатларини олган. Даволаниш муддати уч ҳафтадан зиёдроқни ташкил этади.
