Россияда ўтказилаётган футбол бўйича жаҳон чемпионати гуруҳ босқичининг 2-тур ўйинлари давом этмоқда.
Кечаги куннинг якуний ўйинида Аргентина терма жамоаси кутилмаганда Хорватияга 0:3 ҳисобида енгилди.
Чемпионат олдидан асосий фаворитлар қаторига киритилган, тўрт йил олдинги мундиалда финалда ўйнаган Аргентина бу йил ўзига ўхшамаяпти. 1-турда Исландия билан дуранг ўйнаган лотин америкаликлар 2-турда йирик мағлубиятни қабул қилиб олишди.
Учрашувнинг 1-бўлимида бир қатор хавфли вазиятлар яратилган бўлса ҳам, ҳар икки жамоа улардан унумли фойдалана олишмади.
53-дақиқада Аргентина дарвозабони Кабальеро жиддий хатога йўл қўйди. Бундан унумли фойдалана олган Ребич ҳисобни очди.
Шундан сўнг аргентиналиклар ҳужумга зўр беришди. Бироқ ҳар қанча ҳаракат қилишмасин, натижа чиқмади. Жамоа етакчиси Мессининг ҳам ўйини ўхшагани йўқ.
Учрашувнинг 80-дақиқасида Модрич, 90-дақиқасида Ракитич тўп киритиб, ҳисобни йирик кўринишга келтириб қўйди. Натижада Аргентина терма жамоасининг плей-оффга чиқиш имконияти кескин пасайиб кетди.
Мазкур ўйиннинг ўзбекистонлик ишқибозлар учун аҳамиятли томони, уни ҳамюртимиз Равшан Эрматов бошқариб борди. Айтиш мумкинки, ўзбекистонлик ҳакамлар бригадаси ўзига билдирилган ишончни оқлай олишди.
Аргентина — Хорватия 0:3 (0:0, 0:3)
Голлар: 0:1 — 53 Ребич, 0:2 — 80 Модрич, 0:3 — 90 Ракитич.
Аргентина — Кабальеро, Меркадо, Отаменди, Тальяфико, Сальвио (Павон, 56), Перес (Дибала, 68), Маскерано, Акунья, Месси, Меса, Агуэро (Игуаин, 54).
Хорватия — Субашич, Врсалько, Ловрен, Вида, Стринич, Брозович, Ребич (Крамарич, 57), Модрич, Ракитич, Перишич (Ковачич, 82), Манжукич (Чорлука, 90).
Огоҳлантиришлар: Ребич (39), Меркадо (51), Манжукич (58), Врсалько (67), Отаменди (85), Акунья (87), Чорлука (90).
