Тошкентнинг «Локомотив» футбол клуби Ўзбекистон Кубоги финалида «Бунёдкор» устидан ғалаба қозониб (0:1), кетма-кет иккинчи марта «олтин дубрь» қайд этди.
Учрашувдаги ягона голни «темир йўлчилар» ҳужумчиси Марат Бикмаев киритди ва 26 та гол билан Ўзбекистон чемпионатининг энг яхши тўпурарига айланди.
Бундан аввалроқ «Локомотив» Олий лига чемпиони ҳам бўлди. Ўтган йили ҳам Андрей Микляев шогирдлари мамлакат чемпионати ва Кубогида ғолиб бўлган эди.
Футбол федерацияси матбуот хизматининг хабар қилишича, чемпионларга кубокни ЎФФ президенти Умид Аҳмаджонов ва Осиё футбол конфедерацияси президенти Салмон бин Иброҳим ал-Халифа топширди.
«Локомотив"нинг 36 ёшли капитани Тимур Кападзе учрашувдан сўнг карьерасини якунлади. У 12 маротаба Ўзбекистон чемпиони бўлиб, 9 марта мамлакат Кубогини боши узра кўтарди. Ярим ҳимоячи миллий терма жамоа таркибида 119 та учрашувда қатнашди ва „Пахтакор“, „Бунёдкор“, „Инчхон Юнайтед“ (Жанубий Корея), „Шаржа“ (БАА) ва „Актобе“ (Қозоғистон» каби жамоаларда тўп сурди.
