Самарқанддаги жамоат транспорти бекатларида виртуал китоб жавонлари пайдо бўлди. «Мобиль кутубхона» лойиҳаси Пушкин номидаги Самарқанд вилоят ахборот-ресурс маркази томонидан амалга оширилмоқда.
Йўловчилар смартфон ёрдамида китоблар тасвиридаги QR-кодни сканер қилиб, уни телефонига бепул юклаб олишлари мумкин. QR-кодни таниш учун унга гаджетдаги махсус мобиль илова орқали смартфон ёки планшет камерасини йўналтириш зарур. Кодда танланган китоб жойлаштирилган интернет саҳифа йўналтириш иловаси шифрланган.
Ҳозирда каталогдан ўзбек ва рус мумтоз адабиёти намуналари, Ник Вуйчич, Пауло Коэльо, Адам Жексон, Дейл Карнеги, Жюль Верн, Жоан Роулинг, Шарлотта Бронте каби ёзувчиларнинг 200 дан зиёд асарлари ўрин олган. Бундан ташқари, йўловчилар аудиокитоблар ва инглиз тилидаги асарларни ҳам юклаб олишлари мумкин.
Самарқандда жами бўлиб 20 та виртуал жавон ўрнатилган. Уларни «Кутубхона», «Буюк Ипак Йўли», «Чой фабрикаси», «Талабалар», «Амир Темур» ва бошқаларда учратиш мумкин.
