Ўтган йили Шанхай ҳамкорлик ташкилоти (ШҲТ) давлатларининг ҳуқуқни муҳофаза қилиш тузилмалари томонидан миллиондан зиёд террористик ва экстремистик характердаги ҳужжатлар мавжуд бўлган 100 мингдан зиёд интернет ресурсларга тўсиқ қўйди. Бу ҳақда чоршанба куни Тошкентда бўлиб ўтган Халқаро пресс-клубда ШҲТ Минтақавий аксилтеррор тузилмаси (МАТ) Ижроия қўмитаси директори генерал-полковник Евгений Сисоев маълум қилди.
У кибермакон халқаро террористик ташкилотлар аъзолари учун ўз мақсад ва вазифаларини амалга ошириш, жумладан ёшларни радикаллаштириш, терактлар, ўз бўлинмаларини бошқаришда улкан имкониятлар яратишини таъкидлаб ўтди.
«Биз тушунамиз ва ҳеч қандай хом хаёлларга йўл қўймаймиз, бу айни пайтда энг самарали чора эмас, бироқ бугун бундан воз кечишни ҳам мўлжаллаётганимиз йўқ», — деди у.
ШҲТ МАТ Ижроия қўмитаси директори ШҲТга аъзо давлатларнинг компьютер терроризмига қарши кураш бўйича иккинчи жамоавий штаб ўқувлари декабрда яна бир марта Хитойда бўлиб ўтишини маълум қилди. биринчи ўқувлар 2015 йил охирида Хитойнинг Синьмин шаҳрида бўлиб ўтган эди.
Евгений Сисоев ШҲТ таркибига Ҳиндистон ва Покистон қўшилиши билан ташкилот тадбирларини ўтказишга айрим ўзгартишлар киритилганини қўшимча қилди.
«Эндиликда бизнинг ҳар қандай даражадаги тадбирларимизда саккиз давлат иштирок этади. Биз бу бир оз кечроқ, тахминан 1 январдан бўлиб ўтади, деб ўйлаган эдик, бироқ норматив-ҳуқуқий базанинг чуқур ўрганилиши ҳамкасбларимиз аъзоликнинг биринчи дақиқалариданоқ бу жараёнга киришишлари лозимлигини кўрсатди», — деди у.
