Футбол бўйича Ўзбекистон терма жамоаси 21−24 январь кунлари Бирлашган Араб Амирликларида ўқув-машғулот йиғини доирасида Дания U-23 ва Грузия жамоалари билан ўртоқлик учрашувларини ўтказади, деб хабар қилди Ўзбекистон футбол федерацияси.
Миллий терма жамоа 22 январь куни 17:00 да (Тошкент вақти билан) Дубайдаги The Sevens Stadium стадионида Даниянинг 23 ёшгача ёшлар термасига қарши ўйнайди. 23 январь куни эса Ўзбекистон грузиялик футболчилар билан учрашади.
Жамоа бош мураббийи Самвел Бабаян ҳозирча термага жалб қилинадиган ўйинчиларнинг дастлабки рўйхатини эълон қилгани йўқ.
Эслатиб ўтамиз, 12 февраль куни Ўзбекистон Туркиянинг Анталия шаҳрида Арманистон термаси билан ўртоқлик ўйинини ўтказади.
2018 йили Россияда бўлиб ўтадиган жаҳон чемпионати Осиё саралаш босқичи бешинчи туридан сўнг Ўзбекистон 9 очко билан, А гуруҳида учинчи поғонанини эгаллаб турибди. Эрон (11) ва Жанубий Корея (10) биринчи ва иккинчи ўринларни банд этган.
