Швейцариянинг Casale SA компанияси «Навоийазот» корхонасида йилига 500 минг тонна азот кислотаси ишлаб чиқаришни ташкил этиш бўйича инвестицион лойиҳани амалга оширишга киришди.
Бу ерда замонавий энергия тежовчи технологиялар жорий этилади. Объект ишга тушганидан сўнг корхонада 50 йилдан зиёдроқ вақт муқаддам фойдаланишга топширилган, маънавий ва жисмоний жиҳатдан эскирган қувватлар демонтаж қилинади. Муассаса вакилларининг хабар қилишича, бу азотли ўғитларни олиш бўйича ишлаб чиқариш қувватларининг мажмуавий буткул янгиланишига туртки бериб, қишлоқ хўжалигининг ривожланишига ҳам хизмат қилади.
Йил аввалида «Навоийазот» базасида поливинилхлорид (ПВХ), каустик сода ва метанол ишлаб чиқариш бўйича мажмуа қурилиши бошланиб, Хитойнинг China САМС Engineering ва HQC Shanghai компаниялари билан консорциум ташкил этилган эди. Мажмуа қуввати йилига 100 минг тонна поливинилхлорид, 75 минг тонна каустик сода ва 300 минг тонна метанол ишлаб чиқаришга тенг.
Япониянинг Mitsubishi Heavy Industries ва Mitsubishi Corporation корсорциуми эса аммиак ва карбамид ишлаб чиқаришни йўлга қўйиш бўйича йирик инвестицион лойиҳани амалга оширмоқда. Япониялик пудратчилар билан имзоланган шартномада бу ерда йилига 660 минг тонна аммиак ва 577,5 минг тонна карбамид ишлаб чиқариш кўзда тутилган.
Кўрсатиб ўтилган лойиҳалар Ўзбекистон тикланиш ва тараққиёт жамғармаси, хорижий банкларнинг узоқ муддатли имтиёзли кредитлари ҳамда «Навоийазот"нинг ўз маблағлари ҳисобидан молиялаштирилади. Жадвалга кўра, 2019 йилда ишлаб чиқаришга киришилади. Янги корхоналарда 1300 дан зиёд ишчи ўринлари ташкил этилади.
