2008 йилги Олимпия ўйинларида иштирок этган тўққиз нафар спортчи, жумладан, олти совриндор допинг-намуналар қайта таҳлилидан сўнг дисквалификация қилинди. Бу ҳақда Халқаро олимпия қўмитаси (ХОҚ) сайтида хабар қилинди.
Чоршанба куни ХОҚ намуналари илмий таҳлилнинг энг замонавий усуллари ёрдамида қайта текширувдан ўтганида ижобий натижа берган спортчиларга нисбатан санкциялар қўллади. Бу 2015 йил августида бошланиб, Жаҳон антидопинг агентлиги (WADA) ва халқаро федерацияларни ўзига жалб этган маълумотлар йиғиш жараёнининг натижасидир.
Намунадаги ижобий натижа Ўйинларнинг кумуш медал совриндори ўзбекистонлик эркин курашчи Сослан Тигиевда ҳам аниқланди. Унинг қонида тақиқланган туринабол (4-хлородегидрометилтестостерон) моддаси мавжудлиги маълум бўлди.
Шунингдек, Олимпиада-2008 нинг қуйидаги медалчилари: қозоғистонлик эркин курашчи Таймураз Тигиев (кумуш), украиналик оғир атлетикачи Ольга Коробка (кумуш), белоруслик оғир атлетикачи Андрей Рибаков (кумуш), белроруслик оғир атлетикачи Анастасия Новикова (бронза) ва россиялик енгил атлетикаси Екатерина Волкова (бронза) ҳам мукофотлардан маҳрум этилди.
Пекиндаги Ўйинларда медалларни қўлга кирита олмаган озарбайжонлик оғир атлетикачи Сардар Гасанов, кубалик баландликка сакровчи Вильфредо Мартинес (5-ўрин) ва испаниялик тўсиқлар оша югурувчи Жозефин Оньянинг ҳам тақиқланган препаратлар қабул қилгани маълум бўлди.
Бундан аввалроқ ХОҚ Пекин ва Лондон Олимпия ўйинларида олинган допинг намуналарни икки карра қайта таҳлилдан ўтказган, натижада ўзбекистонлик эркин курашчи Артур Таймазов олтин медалдан маҳрум этилган эди.
