Малайзия пойтахти Куала-Лумпур шаҳрида футбол бўйича Осиё чемпионлар лигасининг чорак финал ўйинларига қуръа ташланди, дея хабар қилди ЎзА.
Мазкур саралаш босқичида қитъанинг саккиз жамоаси икки минтақага бўлинган ҳолда иштирок этади. Ғарб минтақасида мамлакатимизнинг «Локомотив», Қатарнинг «Ал Жайиш», Бирлашган Араб Амирликларининг «Ал Наср» ва «Ал Айн» жамоалари ўзаро баҳслашса, Шарқ минтақасида Хитойнинг «Шандонг Луненг» ва «Шанхай SIPG», Жанубий Кореянинг «Сеул» ва «Чонбук Моторс» жамоалари рақобатлашади.
Қуръа натижасига кўра, «Локомотив» чорак финалда «Ал Айн» жамоасига қарши майдонга тушади. «Ал Наср» ва «Ал Жайиш» ярим финал йўлланмаси учун ўзаро баҳслашадиган бўлди.
Шарқ минтақасида «Шандонг Луненг» ва «Сеул», «Чонбук Моторс» ва «Шанхай SIPG» ярим финал йўлланмаси учун ўзаро куч синашади.
Қоидага биноан Шарқ ва Ғарб минтақасида иштирок этаёган жамоалар финалга қадар ўзаро ўйин ўтказмайди. Ярим финалга чиқадиган жамоалар икки учрашув натижасига кўра аниқланади. Чорак финалнинг дастлабки учрашувлари 23-24 август кунлари, жавоб ўйинлари эса 13-14 сентябрь кунларига мўлжалланган.
«Локомотив» клуби дастлабки учрашувини 23 август куни сафарда, жавоб ўйинини 13 сентябрь куни ўз майдонида ўтказади.
