Футбол бўйича Ўзбекистон терма жамоаси 2 июнь куни Тошкентда Экваториал Гвинея жамоасига қарши ўртоқлик учрашувини ўтказади, дея хабар қилди Футбол федерацияси матбуот хизмати.
Икки мамлакат футбол федерациялари келишувига биноан, ўйин «Бунёдкор» стадионида бўлиб ўтади, бошланиш вақти — 19:00 да. Учрашув жаҳон чемпионати-2018 тўртинчи саралаш босқичига тайёргарлик доирасида ўтказилади.
Экваториал Гвинея термаси ФИФА рейтингида 83-поғонани банд этган. 2015 йилда Африка миллатлар кубогининг ярим финалига қадар етиб борган. Терма жамоага аргентиналик Эстебан Беккер мураббийлик қилади.
Бундан аввалроқ Ўзбекистон ва Қирғизистон термаларининг ўртоқлик учрашуви 2 июнга белгиланганини хабар қилган эдик, бироқ учрашув бекор қилинди.
