Туркия Ўзбекистон билан автомобилсозлик йўналишида ҳамкорликни янада ривожлантиришни истайди. Бу ҳақда Туркия Республикаси Иқтисодиёт вазирлиги Экспорт бош бошқармаси раҳбари Вейсел Парлак 9 ноябрь куни Тошкентда ўтган бизнес-форумда маълум қилди.
«Ўзбекистон ва Туркия ўртасидаги савдо айланмаси 2004 йилда 323 млн АҚШ долларига тўғри келган бўлса, 2014 йилда 4 бараварга ошди ҳамда 1,4 млрд АҚШ долларини ташкил этди. Бу каби иқтисодий кўрсаткичлар Туркия Ўзбекистоннинг бешинчи савдо ҳамкори эканидан далолат беради. Аммо икки давлатнинг савдо салоҳиятини инобатга олсак, ушбу кўрсаткичлар талаб даражасида эмаслигига амин бўламиз», — деди Вейсел Парлак.
Туркия Иқтисодиёт вазирлиги вакили икки мамлакат кўплаб соҳалар қатори автомобилсозлик бўйича алоқаларни янада жадаллаштириши мумкинлигини таъкидлади.
Қайд этилишича, айни пайтда Туркия автомобилсозлик саноати юқори суръатда ривожланмоқда. Мамлакатда 1960-йилларда атиги 3000 дона автомобиль ишлаб чиқарилган бўлса, айни пайтда мазкур кўрсаткич 1,7 миллиондан ошди. Бугун Туркия дунёнинг 196 давлатига автотранспорт воситаларини экспорт қилмоқда. 2014 йилда умумий экспорт миқдори 22,3 млрд АҚШ долларига етди. Шу тариқа Туркия автомобиль ишлаб чиқариш бўйича дунёда 17-, Европада эса 6-ўринни эгаллаб турибди.
«Туркия автомобилсозлари эришаётган муваффақиятлар тасодиф меваси эмас. Аксинча, ушбу ютуқлар мамлакатимизда автомобилсозлик сектори ҳамда унга елкадош бўлган ёрдамчи саноат тараққий этганидан далолат беради», — деди Вейсел Парлак.
Айни пайтда Туркияда соҳа бўйича илмий тадқиқотларга катта аҳамият берилмоқда. Мамлакат бўйлаб фаолият юритаётган элликка яқин илмий марказ автомобилсозлик бўйича изланишлар олиб бориш ва тизимга юқори технологиялар жалб этишга масъулдир.
Вейсел Парлак Ўзбекистон ҳам автомобилсозлик бўйича минтақада етакчи ўрин тутишини таъкидлади.
«Автомобилсозлик тизимида фаолият юритиб келаётган ўзбек ишбилармонларининг хорижликлар билан ҳамкорлиги меваси сифатида „GM Uzbekistan“, „MAN“ каби корхоналар ташкил этилди ва мамлакат Марказий Осиёнинг автомобиль ишлаб чиқарувчи йирик марказига айланди. Шу боис ҳам, биз Туркия автомобилсозларининг вакили сифатида Ўзбекистон билан савдо муносабатларини янада ривожлантириш истагидамиз», — деди Туркия Иқтисодиёт вазирлиги Экспорт бош бошқармаси раҳбари.
Форум доирасида Туркиянинг Улудағ автомобиль саноати экспортчилари уюшмасига аъзо 15 компанияси ҳамда Ўзбекистон автомобиль саноати вакиллари ўртасида музокаралар бўлиб ўтди. «Ўзавтосаноат» компанияси ҳамда Ўзбекистон савдо-саноат палатаси эса туркиялик ишбилармонларга республиканинг қулай бизнес ва сармоя муҳити ҳамда автомобилсозлик салоҳияти хусусида маълумот берди.
Сафар дастурига кўра, Туркия делегацияси вакиллари «СамАвто», «JV MAN Auto Uzbekistan» ва «GM Powertrain Uzbekistan» корхоналари фаолияти билан танишади ҳамда «Auto&Parts Uzbekistan 2015» кўргазмасида қатнашади.
