Baxram Mamatmuratovich Mansurov O‘zbekiston Energetika vazirligi huzuridagi Atom energetikasini rivojlantirish agentligi (“O‘zatom”) direktori etib tayinlandi, deb xabar bermoqda O‘zA.
Bu lavozimga tayinlangunga qadar 2018-yildan buyon “O‘zatom” rahbarining o‘rinbosari, keyin esa birinchi o‘rinbosari lavozimlarida ishlab kelgan.
Baxram Mansurov Ukrainaning Ivano-Frankovsk neft va gaz institutini neft va gaz konlarini o‘zlashtirish texnologiyasi va kompleks mexanizatsiyasi mutaxassisligi bo‘yicha tamomlagan.
1992−1998-yillarda “Sho‘rtangaz” gaz konini boshqarish boshqarmasi operatori, muhandisi, boshlig‘i, 1998−2001-yillarda bosh mutaxassis, qurilish ishlarini monitoring qilish, ishga tayyorlash va ishga tushirish guruhi rahbari lavozimlarida ishlagan.
2017-yilda “O‘zbekneftgaz” AJ ishlab chiqarishni muvofiqlashtirish va yagona texnik siyosatni yuritish bosh boshqarmasi boshlig‘ining o‘rinbosari, 2017−2018-yillarda “O‘ztransgaz” boshqaruvi raisining birinchi o‘rinbosari — bosh muhandisi bo‘lgan.
Ilxom Anvarovich Nimatullayev Energetika vazirligi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi boshlig‘i etib tayinlandi.
U avval Energetika vazirligining Metodika va litsenziyalash boshqarmasi boshlig‘i, ungacha esa Energetika vazirligining Elektr tarmoqlarini rivojlantirish boshqarmasi boshlig‘i, Vazirlar Mahkamasida bosh mutaxassis lavozimlarida ishlab kelgan.
