Yo‘l harakatini tashkil etish bilan bog‘liq munosabatlarni tartibga solishga qaratilgan «Yo‘l harakatini tashkil etish to‘g‘risida»gi yangi qonun loyihasi ishlab chiqildi, deb xabar berdi Qonunchilik palatasi deputati Rasul Kusherbayev.

Unda yo‘l harakatini tashkil etishning asosiy prinsiplari etib quyidagilar belgilanmoqda:

  • fuqarolar manfaatlarining ustuvorligi;
  • yo‘l harakatini tashkil etish bo‘yicha faoliyat va tadbirlarning tizimliligi;
  • ekologiya va atrof muhitni muhofaza qilishning ustuvorligi;
  • piyoda va velosiped harakatlanishi uchun sharoit yaratish;
  • ochiq va jamoatchilikni o‘z vaqtida xabardor etish.

Deputatning yozishicha, ushbu qonun asosida «Yo‘l harakati xavfsizligi to‘g‘risida»gi qonunga ham o‘zgartirish va qo‘shimchalar kiritish, jumladan quyidagilarni belgilash nazarda tutilgan:

  • Haydovchilik huquqini olishga to‘sqinlik qiluvchi kasalliklar ro‘yxati;
  • Haydovchilik huquqini olgandan keyin transport vositasini boshqarishga to‘sqinlik qiluvchi kasalliklar ro‘yxati.

«Ko‘rib turganimizdek, bundan buyon avtomobil haydashning o‘zi bo‘lmaydi. Mas’uliyat bir emas, o‘n baravar oshadi. Albatta mas’uliyat oshishi haydovchilar bilan bir qatorda nazorat qiluvchi organlarning xodimlarida ham parallel ravishda kechmog‘i lozim. Shu bois, o‘rtoqlar avtomobil haydashda „o‘pkani bosib“, xushyorlikni oshirishni hozirdanoq boshlayveraylik», — deya qo‘shimcha qildi Rasul Kusherbayev.

Telegramdan foydalanasizmi? Muhim yangiliklarni o‘tkazib yubormaslik uchun kanalimizga a’zo bo‘ling.

Eslatib o‘tamiz, IIV mazkur qonun loyihasini 2021 yilning dekabrida jamoatchilik muhokamasi uchun e’lon qilingandi.