«Haqiqat va taraqqiyot» sotsial-demokratik partiyasi davlat ro‘yxatidan o‘tkazilmadi, deya xabar bermoqda Adliya vazirligi jamoatchilik bilan
aloqalar bo‘limi.
Ma’lum qilinishicha, Adliya vazirligi tomonidan «Haqiqat va taraqqiyot» sotsial-demokratik partiyasini davlat ro‘yxatidan o‘tkazish yuzasidan arizalar va ilova qilingan hujjatlar qonunchilikda belgilangan tartibda ikki marta o‘rganib chiqilgan.
Partiyani davlat ro‘yxatidan o‘tkazish bo‘yicha hujjatlar «Siyosiy partiyalar to‘g‘risida» va «Nodavlat notijorat tashkilotlari to‘g‘risida«gi qonunlar talablariga rioya qilinmagan holda taqdim qilinganligi aniqlangan.
««Siyosiy partiyalar to‘g‘risida"gi qonunning 6-moddasiga (Siyosiy partiyani tuzish) ko‘ra, siyosiy partiyani tuzish uchun kamida 8 ta hududiy subyektda (viloyatda), shu jumladan Qoraqalpog‘iston Respublikasi va Toshkent shahrida yashayotgan hamda partiyaga birlashish istagida bo‘lgan kamida 20 000 fuqaroning imzosi bo‘lishi talab etiladi. Biroq, partiyani davlat ro‘yxatidan o‘tkazish bo‘yicha bor-yo‘g‘i 9 873 ta imzo yig‘ilgan», — deya qo‘shimcha qilinadi xabarda.
Qayd etilishicha, 7 apreldagi arizaga 7 675 ta (qo‘shimcha 944 ta) va 7 iyundagi arizaga 1 254 ta imzo qo‘ygan fuqarolarning ro‘yxatlari ilova qilingan. O‘rganish jarayonida aniqlanishicha, imzolar ro‘yxatida ko‘rsatilgan shaxslarning 42 nafari vafot etgan.
«Yuqorida ko‘rsatilgan imzolar partiya tuzish bilan bog‘liq bo‘lmagan holda turli sabablar asosida yig‘ilganligi sababli, imzolarni hisobga olmaslik (bekor qilish) ҳақида bugungi kunga qadar vazirlikka jami 2 292 ta murojaat kelib tushdi.
Shunga ko‘ra, «„Haqiqat va taraqqiyot“ sotsial-demokratik partiyasini davlat ro‘yxatidan o‘tkazish rad etildi», — deyiladi xabarda.
Shuningdek, vazirlik «Siyosiy partiyalar to‘g‘risida"gi qonunning 6-moddasiga asosan, tashkiliy qo‘mita tuzilgan kundan boshlab uzog‘i bilan uch oy faoliyat ko‘rsatish huquqiga egaligi va shu munosabat bilan, belgilangan muddat o‘tgandan keyin tashkiliy qo‘mita o‘z faoliyatini tugatishi, imzolar yig‘ish to‘xtatilishi haqida eslatib o‘tdi.
