Қашқадарё вилояти Қарши тумани прокуратураси терговчиси ўз юритувида бўлган иш бўйича пора олгани аниқланди, деб хабар бермоқда Давлат хавфсизлик хизмати.
Ёзилишича, Миришкор туманида яшовчи фуқаро (1983 йилда туғилган) 2021 йилнинг март ойида Қарши туманида яшовчи қариндошининг МЧЖсида наслли чорвани ривожлантирмоқчилигини айтиб, банкдан 450 миллион сўм имтиёзли кредит олган.
Лекин имтиёзли кредит мақсадли йўналтирилмагани сабабли Иқтисодий жиноятларга қарши курашиш департаменти томонидан Жиноят кодексининг 167-моддаси (Ўзлаштириш ёки растрата йўли билан талон-торож қилиш) билан жиноят иши қўзғатилган.
Иш доирасида жорий йил 26 март куни кредит олган шахс қамоққа олинган. Шу билан бирга, терговчи МЧЖ раҳбарига ҳам қамоқ эҳтиёт чораси қўлламаслик эвазига 5 минг доллар талаб қилган.
ДХХ тезкор тадбирида у сўралган пулни хизмат хонасида олган вақтда ашёвий далиллар билан ушланган. Унга нисбатан ЖКнинг 210-моддаси 2-қисми «в» банди (Таъмагирлик йўли билан пора олиш) билан жиноят иши қўзғатилиб, қамоққа олиш тарзидаги эҳтиёт чораси қўлланган.
