Қозоғистон Ички ишлар вазирлиги Россиядаги «Крокус сити ҳолл»да содир этилган терактдан кейин майдони 500 квадрат метрдан ортиқ бўлган барча йирик савдо марказлари ва концерт заллари, шунингдек, таълим, соғлиқни сақлаш объектлари ҳамда одамлар гавжум бўладиган бошқа муассасаларни текширади. Бу ҳақда мамлакат ички ишлар вазири ўринбосари Игорь Лепеха журналистларга маълум қилди, деб ёзди Zakon.kz.
«Бугунги кунда биз ушбу объектларнинг барчасини қўшимча текшириш устида ишлаяпмиз. Аввал текширилган, кўрсатмалар берилган жойларда назорат текширувларини ўтказамиз. Текширилмаганларни эса текширамиз. Қолган жойларда ҳеч бўлмаганда мулк эгалари билан гаплашамиз, техник тайёргарлик масалаларини кўриб чиқамиз ва тавсиялар берамиз. Биз бу борада ишлаяпмиз», — деди у (Zakon.kz келтирган иқтибос).
Вазир ўринбосари бундай ҳолатларда фуқароларга қандайдир тавсиялар бериш қийинлигини, бироқ ҳуқуқ-тартибот идоралари турли алгоритмлар устида иш олиб бораётганини таъкидлади.
«Биз у ерда нима бўлганини, қандай содир бўлганини ҳам кўриб чиқамиз… Масалан, мактаблар учун Таълим вазирлиги билан биргаликда алгоритм ишлаб чиқдик, унга кўра, ўқитувчи синфни беркитиб, баррикада қилиши, деразалардан узоқлашиб, ташқарига чиқмаслиги керак бўлади», — деди Лепеха.
Шунингдек, у январь ойидан бошлаб Қозоғистонда мамлакатга келувчи хорижликлардан мажбурий тарзда бармоқ излари олинаётганини эслатди. «Бу тартиб аллақачон ишлаяпти, йил бошидан буён биз мамлакатимизга киришга уринган 10 нафар жиноятчини аниқладик», — дея қўшимча қилди ички ишлар вазири ўринбосари.
- 22 март куни Москва вилоятидаги «Крокус сити ҳолл» концерт залига бир неча қуролланган шахс бостириб кириб, ўт очди. Улар, шунингдек, бинони бутунлай ёқиб юборди. Сўнгги маълумотларга кўра, теракт оқибатида 143 киши ҳалок бўлган, 360 дан ортиқ киши жароҳатланган. Ҳужумни содир этганликда гумон қилиниб, 11 киши қўлга олинган.
