Ўзбекистон Жаҳон савдо ташкилотининг 2026 йилда Камерунда бўлиб ўтадиган 14-вазирлар конференциясигача ташкилотга аъзо бўлишни режа қиляпти. Бу ҳақда 24 май куни Ўзбекистон бош вазири ўринбосари, ЖСТ билан ишлаш бўйича идоралараро комиссия раиси Жамшид Ходжаев маълум қилди, дейилади ЖСТ сайтида келтирилган маълумотда.
Қайд этилишича, Ўзбекистоннинг ташкилотга аъзо бўлиш бўйича ишчи гуруҳи саккизинчи йиғилишида аъзолар Ўзбекистоннинг қўшилиш юзасидан зарур ислоҳотларни амалга оширишдаги саъй-ҳаракатларини юқори баҳолаган ва ҳали ҳам чора кўрилиши талаб этилаётган соҳаларни алоҳида таъкидлаган.
«Ўзбекистон Жаҳон савдо ташкилотига аъзо бўлиш бўйича ўз мажбуриятларида собит қолмоқда ва биз мазмунли тараққиётга эришиш учун барча имкониятларни ишга соламиз. Мамлакат 2026 йилда Камерунда бўлиб ўтадиган 14-вазирлар конференциясигача ЖСТга аъзо бўлиш ниятида», — деган Жамшид Ходжаев. Бош вазир ўринбосари ўз баёнотида делегатларни қўшилиш жараёнига «инвестиция киритиш ва қўллаб-қувватлаш»га чақириб, уларнинг «ҳамкорлиги, тажриба ва ёрдами» қўшилиш бўйича музокараларнинг муваффақиятли якунланишини таъминлашда муҳим аҳамиятга эга эканини таъкидлаган.
Таъкидланишича, Ўзбекистоннинг аъзо бўлиш жараёни 2020 йил июль ойида бўлиб ўтган ишчи гуруҳнинг тўртинчи йиғилиши билан расман қайта тикланган, шундан сўнг 2022 йил июнь, 2023 йил март ва 2023 йил ноябрь ойларида яна учта учрашув бўлиб ўтган.
Ўзбекистон, шунингдек, Доминикан Республикаси, Исроил, Япония ва Уругвай билан тўртта икки томонлама шартнома имзолагани, ишчи гуруҳнинг еттинчи йиғилишидан буён 33 нафар аъзо билан икки томонлама музокаралар олиб борилгани қайд этиб ўтилди.
Ишчи гуруҳ ҳисоботи лойиҳасининг элементлари ва бошқа қўллаб-қувватловчи ҳужжатлар асосида Ўзбекистон ташқи савдо режимининг турли жиҳатлари муҳокама қилинди ва Ўзбекистон қўшимча мажбуриятларни олишга чақирилди. Аъзолар Ўзбекистоннинг кўп томонлама савдо тизимига қўшилиши ва уларнинг ташқи савдо сиёсати учун аҳамиятини таъкидлади. Йиғилишда Халқаро валюта жамғармаси, Халқаро савдо маркази ва Жаҳон банки вакиллари ҳам иштирок этди.
Келгусида Ўзбекистон ва аъзо давлатлар шу пайтгача эришилган ютуқларни мустаҳкамлаш ҳамда бозорга чиқиш бўйича шартномалар тузишга даъват этилди. Аъзолардан 2024 йил 21 июнга қадар мажбуриятлар лойиҳалари бўйича саволлар, мулоҳазалар ва таклифларни тақдим этишлари сўралди. Жавоблар билан бир қаторда, Ўзбекистон ҳам тасдиқловчи ҳужжатларни тақдим этиши керак.
Ишчи гуруҳнинг навбатдаги йиғилишининг аниқ санаси барча керакли музокаралар маълумотлари тақдим этилгандан сўнггина эълон қилинади.
Эслатиб ўтамиз, 2024 йил март ойида Ўзбекистон ҳукумати Жаҳон савдо ташкилотига аъзо бўлиш доирасида 11 давлат билан музокараларни якунлагани, улардан 9 таси бозорга кириш бўйича музокараларни якунлаш тўғрисидаги протоколларни имзолагани ҳақида ёзгандик.
2023 йил сентябрь ойида Шавкат Мирзиёев БМТ Бош ассамблеясидаги нутқ сўзларкан, «Яқин орада ЖСТга тўлақонли аъзо бўлиш Ўзбекистон иқтисодиётини либераллаштириш йўлидаги устувор йўналишлардан биридир», — деб таъкидлаган эди.
