Яқин 2 ой давомида Тошкент шаҳридаги барча ёруғлик диодли (LED) экранлардаги ташқи реклама объектларининг ёруғлик даражаси меъёрга келтирилади. Бу ҳақда шаҳар ҳокимлиги ҳузуридаги Рақамли ривожланиш департаменти Ташқи реклама лойиҳа офиси раҳбари Алихон Аҳмаджонов маълум қилди.
Унинг айтишича, ҳокимликка аҳоли ва шаҳар меҳмонлари томонидан шаҳар ҳудудига ўрнатилган LED экранлардаги рекламаларнинг ёруғлик даражаси юзасидан мурожаатлар келиб тушган. Шу сабабли ҳозирда ушбу экранларни масофадан туриб ёруғлик ўлчаш ускуналари орқали текшириш бошланган. Дастлабки ўрганиш натижасида шаҳардаги экранларнинг 90 фоиздан кўп қисми меъёрдан юқори ёруғлик тарқатиши аниқланган.
«Ёруғликни меъёрга келтириш жараёни бошланганда биз шунақа ҳолатларни кўрдикки, айрим LED экранларнинг ёруғлик даражаси туннинг қоронғу вақтида меъёридан 50 бараваргача юқори даражада бўлган. Шаҳарсозлик нормаларида тунги вақтда ёруғик диодли мониторларнинг максимал ёруғлик даражаси 100 кандел / кв.м этиб кўрсатилган. Ва биз ҳозирги мониторларни жойига чиққан ҳолда ўлчаб, шу 100 кандел / кв.м даража меъёргача келтириш ишларини олиб бормоқдамиз», — дея тушунтирди лойиҳа офиси раҳбари.
Алихон Аҳмаджоновнинг қўшимча қилишича, ёруғлик даражасини бузганлик учун ҳеч қандай жазо мавжуд эмас. Лекин ҳозирда «Ҳудудий электр тармоқлари» билан биргаликда ушбу экранлар эгалари томонидан меъёрга келтирилмаган тақдирда, уларни мажбурий тартибда электр тармоғидан узиш режалаштирилмоқда.
Аввалроқ Алихон Аҳмаджонов «Газета.uz»га берган интервьюсида фуқаролар экран ёруғлигидан шикоят қилганидан сўнг, департамент реклама эгаларидан уни камайтиришни сўраганини маълум қилганди. Бироқ олдин ёрқинлик визуал тарзда аниқланган, шу сабабли масофавий ёруғлик ўлчагичларини сотиб олиш режалаштирилган эди.
