Россиянинг ракета зарбалари оқибатида Украина деярли барча иссиқлик энергияси ишлаб чиқариш объектларини йўқотди. Бу ҳақда Украина президенти Владимир Зеленский 17 апрель куни Европа кенгаши йиғилишида маълум қилди.
«Россия биздаги иссиқлик энергияси ишлаб чиқариш объектларининг деярли барчасини йўқ қилди. Тўғонлар ва ГЭС ускуналари, шунингдек, газ инфратузилмаси ҳам террорчилар томонидан ҳужумга учрамоқда», — деди Зеленский.
Унинг сўзларига кўра, Украина расмийлари атом электр станциялари ва тарқатиш тармоқлари инфратузилмаси ҳужумлар таҳдиди остида эканини истисно қилмаяпти. «Россия радиациявий шантаждан воз кечмаяпти ва, хусусан, Запорожье АЭС хавфсизлиги билан шафқатсизларча ўйнашишда давом этмоқда», — дея қўшимча қилди у.
Зеленский яна Ғарбдаги иттифоқчиларни Украинани ҳаво ҳужумига қарши мудофаа тизимлари билан таъминлашга чақирди: «Буни фақат ҳаво мудофааси — Patriot, Iris-T, Samp-Т, Nasams каби махсус тизимлар тўхтатиши мумкин. Сизда мавжуд бўлган тизимлар. Улар Украинага ҳозир керак — Путин террорчилик усулларидан фойдаланишига йўл қўймаслик учун», — деди у.
Россия қўшинлари март ойида Украинанинг энергетика инфратузилмасини ўққа тутишни тиклади. Харьков вилоятига зарбалар Змиевская ИЭСга жиддий зарар етказди. 11 апрель куни ҳужум оқибатида Киев, Черкасси ва Житомир вилоятларини электр энергияси билан таъминловчи энг йирик Триполье ИЭС вайрон қилинди.
Зеленский Триполье ИЭСнинг вайрон қилинишини Украинада Россия ҳужумини қайтариш учун ҳаво ҳужумидан мудофаа снарядлари тугаб қолгани билан изоҳлади. «Мен сизга жуда оддий мисол келтираман — Триполье станцияси, Киев вилоятининг ёритилиши унга боғлиқ. 11 та ракета учаётган эди, биз биринчи еттитасини йўқ қилдик, тўрттаси Трипольени вайрон қилди. Нега? Чунки бизда 0 та ракета бор эди, Трипольени ҳимоя қилган барча ракеталар тугаганди», — деди Украина президенти.
CNN аввалроқ Россия сўнгги ҳафталарда Украина энергетика объектларини ўққа тутишнинг янги тактикасини қўллай бошлаганини ёзган эди. Бу чекланган миқдордаги нишонларга қарши оммавий зарбалардан иборат. Ҳужумлар вақти ҳам ўзгарган — аввалгидек қишда эмас, баҳорда, деб таъкидлади телеканал. Бунинг сабабларидан бири шундаки, Россия Украина электр станциялари ҳаво ҳужумидан мудофаа тизимлари билан камроқ ҳимояланган вақт келишини кутган.
Украина қуролли кучлари АҚШ ёрдами кечикаётгани сабабли ўқ-дориларнинг кескин танқислигини бошдан кечирмоқда. Уни ажратиш учун Америка Конгрессидаги ҳар икки палатанинг розилиги керак, бироқ ўтган йилнинг декабрь ойидан бери қонунчилар Киевни молиялаштириш пакети бўйича келиша олмаяпти.
