«Ўзбекистон темир йўллари» компанияси дизайнерларни Hyundai Rotem тезюрар поезди дизайни бўйича танловда иштирок этишга таклиф қилди.
Иштирокчилар поездининг ўзига хос ва жозибали ташқи кўринишини яратиши лозим бўлади. Танлов ғолиби 100 млн сўм миқдоридаги мукофотга эга бўлади ва поездда ўз дизайнидан ташқари ғолиб исмининг бош ҳарфлари ҳам тасвирланади.
Танлов шартлари:
- Иккитадан ортиқ бўлмаган дизайн вариантини тақдим этиш.
- Ишларни dizayn-nsr@uzrailway.uz электрон манзилига 2024 йил 12 майгача жўнатиш.
- Мавзу қаторида «Hyundai Rotem poezd dizayni tanlovi.», деб ёзиш.
- Алоқа маълумотларини кўрсатиш (Ф.И.Ш., телефон рақами)
Техник топшириқ «Ўзбекистон темир йўллари» сайтида эълон қилинди. Саволлар бўлса, қуйидаги телефон рақамига мурожаат қилиш мумкин: 71−299−92−66.
Эслатиб ўтамиз, Hyundai Rotem тезюрар электропоезди, хусусан, Тошкент ва Хива ўртасидаги темир йўл қатнови учун харид қилиниши режалаштирилган. Поезд 7 та вагондан иборат бўлиб, 351 нафар йўловчига мўлжалланган ва 250 км/соат тезликка эриша олади.
Умуман олганда, президентнинг 2023 йил 10 октябрдаги қарори билан Ўзбекистон жами 6 та Hyundai Rotem поездини харид қилиши белгиланган. Шу мақсадда ноябрь ойида Корея Республикасининг Иқтисодий ривожланиш ва ҳамкорлик жамғармаси (EDCF) ҳисобидан 185 млн евро миқдорида кредит жалб этиш режалаштирилганди.
