Россия Ички ишлар вазирлиги ҳукуматга миграция соҳасида давлат назоратини кучайтиришни назарда тутувчи қонун лойиҳасини тақдим этди.
Ҳужжат, номидан кўриниб турибдики, чет эл фуқаролари ва фуқаролиги бўлмаган шахсларнинг Россияга кириши ва чиқиши, шунингдек, уларнинг Россия ҳудудида бўлиш ва яшаш шартларини тартибга солади.
Қонун лойиҳаси билан, хусусан, қуйидагилар таклиф этилмоқда:
- чет эл фуқароларининг вақтинча бўлиш муддатини календар йили учун 90 кунгача қисқартириш (ҳозирда олти ой учун 90 кун);
- Россияга киришда биометрик шахсий идентификацияни жорий этиш. Бу РФга кирувчи барча чет элликларнинг бармоқ изини мажбурий рўйхатдан ўтказиш ва суратга олишни назарда тутади;
- Россияда ноқонуний бўлиб турган чет элликлар учун назорат режимини ўрнатиш;
- давлат органларининг ахборот тизимларидан у ҳақдаги барча маълумотларни тўплайдиган хорижий фуқаронинг рақамли профилини яратиш;
- РФ ҳудудидаги чет эл фуқаросининг шахсини тасдиқловчи ягона ҳужжатни жорий этиш, бу бугунги кунда мавжуд бўлган мамлакатда яшаш ва ишлаш ҳуқуқини тасдиқловчи барча миграция ҳужжатларининг ўрнини босади;
- чет эллик ишчиларни Россияда ишлаш ҳуқуқини берувчи махсус реестрга, иш берувчиларни эса чет элликларни ёллашга рухсат берувчи бошқа реестрга киритиш;
- чет элликлар билан, агар улар қонунчиликни бузса, Россияга кириш, мамлакатда қолиш ва яшаш ҳуқуқларини эҳтимолий чеклаш тўғрисида содиқлик шартномасини тузиш;
- нафақат судларга, балки суддан ташқари федерал ижроия органларига ҳам чет элликларни мамлакатдан чиқариб юбориш тўғрисида қарор қабул қилиш ҳуқуқини бериш;
- чет эл фуқароларининг Россияда бўлиши (яшаши) устидан маъмурий назоратни полициянинг функцияларидан бирига айлантириш.
ИИВ матбуот хизмати хабарида айтилишича, қонун лойиҳаси чет элликларнинг «айрим ҳуқуқларини чеклаш» ва «уларга қўшимча масъулият юклаш» билан боғлиқ чора-тадбирларни қўллаш учун «зарур шароитлар» яратади.
Бундан ташқари, барча давлат органлари, ташкилотлар ва фуқаролар хорижликларнинг Россияда бўлиши қонунийлиги тўғрисидаги электрон тасдиқловни онлайн тарзда олишлари мумкин бўлади. Ушбу тасдиқ кўчмас мулкка бўлган ҳуқуқларни рўйхатдан ўтказиш, никоҳ, бола туғилиши, олий ўқув юртлари, коллежлар ва мактабларга ўқишга киришда талаб қилинади, дейилади ИИВ хабарида.
Агентликнинг кейинроқ аниқлик киритишича, хорижликларнинг Россияда бўлиш муддатига чекловлар яшаш ёки ишлаш учун рухсатномаси бор, патент олган ёки меҳнат шартномасини имзолаган шахсларга нисбатан қўлланмайди.
Ўтган йилнинг ноябрь ойида Россия ИИВ ноқонуний мигрантлар учун назорат режими жорий этишни таклиф қилган эди. Реестрга киритилганларга машина ҳайдаш, пул ўтказиш ва турмуш қуришни тақиқлаш режалаштирилган эди.
