Boeing самолётлар хавфсизлиги билан боғлиқ қатор можаролардан сўнг компаниянинг энг катта инқирози фонида раҳбариятида жиддий ўзгаришлар бўлганини эълон қилди.
Boeing бош директори Дэйв Калхун 2024 йил охирида истеъфога чиқади. Самолёт ишлаб чиқарувчи компания директорлар кенгаши раиси Ларри Келлнер ва тижорат самолётлари бўлими раҳбари Стэн Дил ҳам ўз лавозимларини тарк этиши маълум қилинган.
Reuters агентлигининг қайд этишича, Boeing самолётларининг бир қатор носозликлари бошқарув таркибидаги ўзгаришларга олиб келди, бу эса соҳанинг компанияга бўлган ишончига путур етказди. Охирги воқеа январь ойида Alaska Air авиакомпаниясининг Boeing 737 MAX 9 лайнери билан содир бўлди. Самолёт кўтарилиши чоғида фавқулодда чиқиш панели узилиб кетганидан сўнг кема фавқулодда қўнишга мажбур бўлди. Текширув натижасида панелда тўртта мурват етишмаслиги аниқланди.
Шундан сўнг АҚШ Федерал авиация бошқармаси (FAA) Boeing 737 MAX 9 самолёти эксплуатациясини тўхтатиб, компаниянинг сифат назорати тизимини текширишни бошлади. Январь ойи охирида FAA 737 MAX 9 самолётларига парвозларни давом эттиришга рухсат берилди, аммо муаммолар ҳал этилмагунча Boeing компаниясига 737 MAX оилавий самолётларини ишлаб чиқаришни кўпайтирмаслик шарти қўйилди.
Март ойи бошида FAA Boeing компаниясига тизимли сифат назорати муаммоларини ҳал қилиш учун кенг қамровли ҳаракатлар режасини тайёрлашга 90 кун вақт берди. The New York Times нашрининг ёзишича, компания 89 та регулятор текширувидан 33 тасида муваффақиятсизликка учраган.
Boeing ходимларига йўллаган мактубида Калхун Alaska Airlines бортида содир бўлган воқеани «компания учун бурилиш нуқтаси» деб атади. «Бутун дунёнинг нигоҳи бизда. Биз хатоликларни бартараф этамиз ва компаниямизни тикланиш ва барқарорлик йўлига қайтарамиз», — деди у кетишини эълон қилаётиб.
Қолаверса, Калхуннинг истеъфоси самолёт ишлаб чиқарувчисининг дунёдаги кўплаб йирик авиакомпаниялар раҳбарлари томонидан танқид қилиниши фонида содир бўлмоқда, деб таъкидлайди CNN. Авиакомпаниялар Boeing`дан олган самолёти сифатидан ҳам, корпорация самолётни ўз вақтида етказиб бера олмаслигидан ҳам ранжимоқда. Шу билан бирга, CNN`га кўра, Boeing мижозларининг узоқ кутиш рўйхатлари ва учувчиларни қайта тайёрлаш зарурати туфайли Airbus`га ўтиб кетиши қийин.
- Дэйв Калхун 2020 йилда Boeing бош директори лавозимини эгаллаганди, у 2018 ва 2019 йилларда 346 кишининг ҳаётига зомин бўлган иккита Boeing 737 MAX ҳалокатига масъул бўлган Деннис Мюленбургнинг ўрнини эгаллаган. Ўшанда иккала ҳодисага ҳам лайнерлар конструкциясидаги муаммолар сабаб бўлганди.
