Шавкат Мирзиёев Наманган вилоятига ташрифи чоғида янги электр станциялари қурилишига бағишланган маросимда иштирок этди, деб хабар қилди давлат раҳбари матбуот хизмати.
Бугунги кунда Наманганда жами 913 мегаватт генерация қуввати мавжуд. Сўнгги уч йилда электр истеъмоли 24 фоизга ўсган ва бу давом этади.
Шу боис вилоятда жами қиймати 1,1 миллиард доллар, қуввати 1 минг 228 мегаватт бўлган учта мажмуа лойиҳалаштирилди. Булар гидроэлектр станциялар каскади ҳамда иккита қуёш электр станциясидир.
«Ўзбекгидроэнерго» акциядорлик жамияти 434 миллион доллар эвазига Уйчи тумани, Норин дарёсида 228 мегаваттли 6 та ГЭС каскадини қуради. Бунинг натижасида йилига 1 миллиард киловатт-соат электр энергияси ишлаб чиқарилади, 310 миллион метр куб газ иқтисод қилинади, 430 минг хонадонга электр узатилади.
Ушбу ГЭС тўлиқ мамлакатда ишлаб чиқарилаётган ускуна ва технологиялар ҳисобига қурилиши кутилмоқда.
Поп туманида Германиянинг Hyper Partners компанияси томонидан 500 мегаватт қувватли қуёш электр станцияси қурилади. Мазкур лойиҳанинг қиймати 350 миллион доллар бўлиб, йиллик ишлаб чиқариш ҳажми 1 миллиард 95 миллион киловатт-соатни ташкил этди. Hyper Partners Tashkent City Mall мажмуасини қурган, шунингдек, UTI Transit (ёқилғи етказиб бериш ва унинг улгуржи савдоси билан шуғулланувчи компанияларга эгалик қилади), Euroasia Transportation and Logistics Company (юк ташуви), Cinematica (фильмлар намойиши), ZEM Ultra-Logistics ва AKA Petroleum (омборга жойлаш ва сақлаш) компанияларида улушдор ҳисобланади (ёки аввал улушдор бўлган).
Бирлашган Араб Амирликларининг Tepelen Group Holding Limited компанияси билан ҳамкорликдаги қуёш электр станцияси ҳам Попда қурилади. Унинг ҳам қиймати 350 миллион доллар, қуввати 500 мегаватт бўлади.
Жорий йил охиригача мазкур станцияларни тармоққа улаш режалаштирилган.
Мазкур лойиҳалар натижасида Наманган вилоятининг генерация қувватлари 2141 мегаваттга етади. Йиллик 7,8 миллиард киловатт-соат электр энергияси ишлаб чиқарилади. Бу эса вилоятнинг электр энергиясига бўлган 5,5 миллиард кВт соатлик талабини тўлиқ қоплайди. Ортган 30 фоиз электр Андижон ва Фарғона вилоятларига йўналтирилади.
Маросимда Шавкат Мирзиёев рамзий тугмани босиб, мазкур йирик энергетика лойиҳалари қурилишини бошлаб берди.
Эслатиб ўтамиз, 2025 йилда Поп ва Уйчи туманларида умумий қуввати 200 МВт бўлган электр энергиясини сақлаш тизимларини ишга тушириш режалаштирилмоқда. Ушбу лойиҳалар истеъмолнинг кўпайиши даврида ягона энергия тизимини мувозанатлаш ва истеъмолчиларни электр энергияси билан барқарор таъминлашга ёрдам беради.
Шу йили яна 14 та қуёш ва шамол станцияси қурилиши доирасида тармоққа 2,6 ГВт қувват уланади.
