25 март куни Шавкат Мирзиёев Наманган вилоятига ташрифи доирасида Янги Наманган туманидаги Gavhar Jewel Group корхонасида бўлди.
Корхона йилига 1200 кг заргарлик буюмларини саноат усулида ишлаб чиқариш қувватига эга. 2022 йилда очилган заводда Туркия, Италия, АҚШ ва Германиядан келтирилган ускуналар ўрнатилган. Лойиҳа қиймати 6,5 миллион доллар бўлиб, шундан 3,5 млн доллари асбоб-ускуналар, 1 млн доллари ишлаб чиқариш мажмуаси ва 2 млн доллари хомашё базасини шакллантиришга сарфланган.
Бугунги кунда корхонада 10 минг хил дизайндаги заргарлик буюмларини ишлаб чиқариш ўзлаштирилган. Чет эллар билан ҳамкорликда қўл соатларининг тилла корпусини тайёрлаш йўлга қуйилган. 2023 йилда 270 килограмм маҳсулот ишлаб чиқарилган.
Бундан ташқари, бу ерда 3D моделлаштириш орқали буюртма асосида исталган кўринишдаги буюмларни ишлаб чиқариш мумкин.
Маълум қилинишича, корхонада маҳаллий заргарлар билан кооперация йўлга қўйилган. Натижада «яширин ишлаганлар «соя»дан чиққан», иш ўринлари кўпайган. Корхонада 100 дан ортиқ кишининг бандлиги таъминланган.
Давлат раҳбари корхона заргарлари билан суҳбатлашди.
«Мамлакатимизда йилига 100 тонна олтин қазиб олаяпмиз. Уни заргар тадбиркорларга бўлиб тўлаш шарти билан сотишга рухсат берилган. Очиғи, бундай имкониятлар ҳеч қайси давлатда йўқ. Лекин юртимизда олтиннинг атиги 6 фоизи қайта ишланяпти. Олтин қазиб олинмайдиган мамлакатлар биздан кўп экспорт қиляпти. Бу соҳада бироз кечикдик. Шунинг учун ишлаб чиқаришга қўшимча шароитлар яратяпмиз. Бу — ҳали бошланиши. Соҳани ҳали яна ривожлантирамиз», — деди Шавкат Мирзиёев.
Президент ўша ерда туркиялик ишбилармонлар билан тажриба алмашиш, соҳага оид қонунчиликни такомиллаштириш масалалари бўйича мулоқот қилди.
Давлат раҳбари йилига 20 минг тонна бурама мих ва 18 минг тонна рулонли қоғоз ишлаб чиқарадиган, 6 млн долларлик экспорт қувватига эга «Мехмаш» масъулияти чекланган жамияти маҳсулотларини ҳам кўздан кечирди. Корхонада 700 киши иш билан таъминланган.
Шавкат Мирзиёев бозор талабидан келиб чиқиб, автомобиль саноатида қўлланадиган маҳкамлаш маҳсулотлари ҳажмини ва экспортини ошириш, иш ўринларини кўпайтириш режалари юзасидан кўрсатмалар берди.
Маълумот учун, «Мехмаш» ва Gavhar корхоналаридаги асосий улуш Дилдора Заҳиджоновна Исаевага тегишли.
