Ўзбекистонда тадбиркорлик соҳасидаги агентлик ва жамғармалар ўрнига Савдони ривожлантириш компанияси ташкил этилади, дея хабар берди президент матбуот хизмати.
Президент 12 март куни тадбиркорлар фаолиятини кенгайтириш ва экспортга жалб этиш бўйича таклифлар тақдимоти билан танишди. Мазкур таклифларни ишлаб чиқиш бўйича Шавкат Мирзиёев 2023 йил 18 декабрда бўлиб ўтган видеоселектор йиғилишида топшириқ берган. Шундан сўнг, экспертлар иштирокида тадбиркорларнинг таклифлари асосида янги ёндашувлар ишлаб чиқилган.
«2023 йили экспортчи корхоналарга 665 млрд сўмлик ёрдам кўрсатилиб, 3 млрд 200 млн долларлик экспорт таъминланган. Лекин айрим тармоқ ва ҳудудларда бу маблағлардан самарали фойдаланилмаган. Электр техникаси, қишлоқ хўжалиги, фармацевтика, заргарлик тармоқларида экспорт ўртача кўрсаткичларга етмаган. Уюшмалар томонидан 2 минг 709 та салоҳиятли экспортчилар қамраб олинмаган, уларга ҳалигача бирор ёрдам кўрсатилмаган», — дейилади хабарда.
Шу сабабдан ҳудудларда ишлаб чиқариш, саноат зоналари ва экспорт масалаларини яхлит тизимда бирлаштириш мақсадида 12 та тармоқ ва саноат уюшмасини Савдо-саноат палатаси тизимига ўтказиш таклиф этилмоқда.
«Бу орқали лойиҳа тайёрлаш ва экспорт тизими давлатдан тадбиркорлар ўзини ўзи бошқарадиган ташкилотга ўтади. Натижада уларнинг талаб ва истакларини эшитиш, муаммоларини ҳал қилиш осонлашади, тадбиркорларнинг ўзаро ҳамкорлиги кучаяди», — дейилади хабарда.
Шунингдек, ривожланган мамлакатлар тажрибасидан келиб чиқиб, соҳадаги агентлик ва жамғармалар ўрнига Савдони ривожлантириш компанияси ташкил этилади. У чет элдан малакали дизайнер, технолог ва маркетологларни жалб этиб, миллий маҳсулотларни халқаро талабларга мослаштириш, экспортчиларнинг янги бозорларга чиқишига кўмаклашиш, миллий брендларни хорижда тарғиб қилиш билан шуғулланади. Бу компания томонидан субсидия, компенсация ва бошқа кўмаклар тадбиркорларнинг барқарорлик рейтинги асосида ажратилади.
Шунингдек, «Ўзбекэкспертиза» акциядорлик жамиятининг бошқаруви ҳамда Савдо-саноат палатаси билан алоқалари кучайтирилади. Барча туманда Тадбиркорларни қўллаб-қувватлаш лойиҳа офислари иш бошлайди.
Йиғилишда мутасаддилар 2024 йил маҳаллий саноат экспорти ҳажмини 12 млрд долларга етказиш режалари тўғрисида ахборот берган.
18 декабрь куни бўлиб ўтган видеоселектор йиғилишида президент энди ҳудудларда ишлаб чиқариш, саноат зоналари ва экспорт билан Савдо-саноат палатаси шуғулланишини маълум қилганди. Шунингдек, Инвестициялар, саноат ва савдо вазирлигининг вилоят бошқармалари ва туман бўлимлари тугатилиши, Экспорт агентлиги ва жамғармаси, «Ўзбекэкспертиза» ташкилоти ҳам Савдо-саноат палатаси тизимига ўтиши таъкидланганди.
Бундан ташқари, йиғилишда маҳсулотларнинг сифатини таъминлаш мақсадида хориждан дизайнер, маркетолог ва конструкторлар жалб этиш кераклиги айтилганди. Президент мамлакат маҳсулотларининг фақат сотилиши эмас, балки ташқи бозорларда бренд сифатида танилиши учун ҳам кўмаклашиш зарурлигини таъкидлаганди.
