Ўзбекистонда 16−18 март кунлари умумхалқ хайрия ҳашари ўтказилади. Бу ҳақда Давлат хизматини ривожлантириш агентлиги хабар берди.
Ҳашар «Обод ва файзли маҳалла — юрт кўрки» шиори остида ўтказилади.
Маълумот учун, ушбу саналар мос равишда шанба, якшанба ва душанбага тўғри келмоқда. Бу йил март ойида кечиктирилган дам олиш кунлари бўлмайди, фақат қўшимча дам олиш кунлари берилади. Тўрт кунлик таътил Наврўз байрамига тўғри келади. «Газета.uz» илгари март дам олиш кунлари учун тақвимни эълон қилганди.
Ундан кўзланган мақсад маҳаллалар, аҳоли турар жойлари, хиёбонлар, истироҳат боғлари, зиёратгоҳлар ва қабристонлар ва бошқа жойларни ободонлаштиришдан иборат. Бундан ташқари, шу куни аҳолининг ижтимоий ҳимояга муҳтож қатламига ёрдам кўрсатилади.
Эслатиб ўтамиз, 2018 йил май ойида ҳукумат ҳашарлар фақат ихтиёрий равишда ва ҳашар иштирокчилари ишлайдиган ташкилот ҳудудида меҳнатни муҳофаза қилиш ва хавфсизлик стандартларига қатъий риоя қилган ҳолда ўтказилиши мумкинлиги тўғрисида қарор чиқарганди.
