Европа иқлим хизмати Copernicus ҳисоботига кўра, 2024 йилнинг февраль ойи метеорологик кузатувлар тарихидаги энг иссиқ февраль бўлди.
Февраль ойидаги ўртача ҳарорат 13,54 даражани ташкил этган, бу 1991−2020 йиллардаги ўртача кўрсаткичдан 0,81 даражага юқори ҳисобланади. Бу натижа, шунингдек, 2016 йилнинг феврали — бундан аввалги рекордга нисбатан ҳам 0,12 даражага кўп.
Синоптикларнинг таъкидлашича, февраль ойининг биринчи ярмида ўртача кунлик глобал ҳарорат жуда юқори бўлган. 8−11 февраль оралиғида кўрсаткичлар 1850−1900 йиллардаги саноатгача бўлган ҳолатдан 2 даража юқори бўлган.
Copernicus`нинг таъкидлашича, ўтган февраль ойи, шунингдек, ҳаво ҳарорати об-ҳаво рекордларидан ошиб кетган кетма-кет тўққизинчи ой бўлган.
Февраль ойида Европа бўйлаб ўртача ҳарорат одатдагидан 3,3 даража юқори бўлган. Бундан ташқари, Сибир минтақалари, Шимолий Американинг бир қисми, Жанубий Американинг катта қисми, Африка ва ғарбий Австралияда об-ҳаво илиқроқ бўлган.
«Февраль сўнгги бир неча ой ичида кузатилаётган кетма-кет рекордлар қаторига қўшилди. Бу қанчалик ажойиб кўринмасин, аслида ажабланарли эмас, чунки иқлим тизимининг доимий исиши муқаррар равишда янги экстремал ҳароратларга олиб келади. Иқлим атмосферадаги иссиқхона газларининг ҳақиқий концентрациясига жавоб беради, шунинг учун уни барқарорлаштира олмасак, муқаррар равишда янги глобал ҳарорат рекордлари ва уларнинг оқибатларига дуч келишда давом этамиз», — деди Copernicus директори Карло Буэнтемпо.
Синоптикларнинг маълумотларига кўра, 2023/2024 йилги қиш мавсумида (декабрь-январь-февраль) ёғингарчилик дунёнинг бир қатор минтақаларида ўртача даражадан юқори бўлган. Улар орасида Марказий Осиё, Хитой, Япония, Покистон ва бошқалар бор.
- Бир кун аввал Ўзгидромет жорий қишда Ўзбекистонда ўртача ҳаво ҳарорати меъёрдан 1,5−2,6 даража юқори бўлганини маълум қилган эди. Январь ойи «манфий аномалия»га асосий ҳиссани қўшган, февраль эса энг қорли ой бўлган.
- 2024 йилнинг январи ҳам дунё бўйлаб мазкур ой учун рекорд даражада иссиқ кечганди. Бу ойда ўртача глобал ҳарорат 13,14 даражани ташкил этган.
