Италия ўсмирлар терма жамоасининг уч нафар спортчиси Италияда ўзбекистонлик 17 ёшли қиличбозни зўрлаганликда гумон қилинмоқда. Бу ҳақда зўравонликка қарши курашувчи Nemolchi.uz лойиҳаси Radiotelevisione Italiana таяниб хабар берди. Аввалроқ, 3 март куни Италиянинг Il Messaggero газетаси ҳам бу ҳақда ёзган эди (Россиянинг «Коммерсант» нашри бунга таяниб, рус тилида хабар эълон қилган).
Ҳолат 2023 йилнинг 4 августидан 5 августига ўтар кечаси Италия қиличбозлик федерацияси (FIS) томонидан Кьянчано-Терме шаҳрида ташкил этилган ўқув-машғулот йиғини вақтида содир бўлган.
Radiotelevisione Italiana хабарига кўра, жабрланувчи терговчиларга кечаси йиғин иштирокчилари учун зиёфат бўлганини айтган. Қиз нимадир ичган, шундан сўнг уч нафар йигит билан бир хонада уйғонган. Қиз у ерга қандай бориб қолганини эслолмаган. Хонадан қочмоқчи бўлганида, қаттиқ оғриқни ҳис қилган. У хонасига қайтгач, жамоадошига бўлган воқеани айтиб берган. Қизнинг танасида кўкаришлар ва жароҳатлар бўлган. Хонадош шериги жабрланувчининг онасига қўнғироқ қилган, шундан сўнг аёл етиб келиб, қизини тез ёрдам бўлимига олиб борган ва жинсий зўравонлик ҳақида полицияга хабар берган.
Ҳозирда икки нафар гумонланувчига нисбатан тергов ҳаракатлари олиб борилмоқда, учинчисига нисбатан иш эса вояга етмаганлар бўйича прокуратура томонидан текширилмоқда, чунки унинг ўзи ҳали 18 ёшга тўлмаган. Улар айбловларни рад этиб, айбсиз эканини таъкидламоқда.
Жабрланувчининг адвокати Лусиано Гуидарелли прокуратура ва Италия қиличбозлик федерациясининг тергов остидаги спортчиларга нисбатан чора кўришдаги муносабатини қоралади, дейилади хабарда.
Италия қиличбозлик федерациясининг таъкидлашича, «вазиятга ойдинлик киритиш ва терговни ривожлантириш учун суд органлари билан бир неча марта тўғридан-тўғри муҳокамалар ўтказилган, шунингдек, ҳар қандай суд процессида фуқаролик даъвогар сифатида иштирок этиш учун ариза берилган».
Кьянчано-Терме мери Андреа Маркетти муниципалитет зўравонлик жабрланувчиси ва унинг оиласига тўлиқ қўллаб-қувватлов ва бирдамлик изҳор қилиб, «шахсига аниқлик киритилган» заҳоти айбланувчиларга қарши фуқаролик даъвоси қўзғалишини маълум қилган.
Ўзбекистон қиличбозлик федерацияси 5 март куни бу маълумотни рад этиб, 2023 йил август ойи бошида қиличбозлик бўйича терма жамоа аъзолари Италиядаги халқаро ўқув-машғулот йиғинларида эмас, Хитойда бўлиб ўтган Бутунжаҳон Универсиада мусобақаларида иштирок этганини маълум қилган.
Муносабатда «бу асоссиз, ишончсиз ва, боз устига, текширилмаган маълумотларнинг чоп этилиши соҳта ва ёлғон» экани ҳамда «айрим интернет сайтлари муҳаррирлари ОАВнинг ахлоқий меъёрларига риоя қилмаётгани» қайд этилган.
«Бу маълумот ўзбекистонлик қиличбозларимиз жаҳон рейтингида етакчилик қилаётган бир пайтда Италия қиличбозлик федерацияси раҳбарияти томонидан тайёр сценарий асосида ёзилган махсус тайёрланган ёлғон хабардир», — дейилади хабарда.
Федерациянинг таъкидлашича, бундай уринишлар «кучли спортчиларга бевосита қаратилган спорт ва сиёсий ўйинларнинг энг кенг тарқалган усулларидан бири» ҳисобланади.
