Ўзбекистонлик гроссмейстер Нодирбек Абдусатторов динамик (онлайн) рейтингда дунёнинг энг кучли беш нафар шахматчиси қаторидан жой олди (февраль ойи натижаларига кўра, Халқаро шахмат федерацияси рейтингида 11-ўринни эгаллаб турибди).
У 27 февралдан 7 мартгача Прага шаҳрида бўлиб ўтаётган Prague International Chess Festival (классик шахмат фестивали) супертурнири доирасида ўз рейтингини яхшилади.
Ўзбекистонлик спортчи гроссмейстерлар: Тай Дай Ван Нгуен, Давид Навара ва Матеуш Бартель устидан учта ғалабага эришди. У ўз рейтингини 11,1 Эло баллига оширди ва жаҳон рейтингида бешинчи ўринга кўтарилди. Шу тариқа, 19 ёшли Нодирбек Абдусатторов Алиреза Фирузджа ва Ян Непомняшийдан ўтиб кетди. Уни жаҳон чемпиони Дин Лижэндан бир очко ҳам ажратиб турмаяпти.
Аввал хабар берганимиздек, Нодирбек Абдусатторов ўзбекистонлик шахматчилар ўртасида рекорд ўрнатган: бир йил аввал у энг юқори рейтингга эга ўзбекистонлик бўлганди, энди эса жаҳоннинг кучли ўнталигига кирди. Бунгача фақат Рустам Қосимжонов 2715 балл билан 11-ўринни эгаллаган эди.
Нодирбек Абдусатторов Халқаро шахмат федерацияси (ФИДE) томонидан дунёнинг энг яхши ёш шахматчилари рейтингида ҳам биринчи ўринни эгаллаганди.
Prague Chess Festival 2024 — Номзодлар турнирининг уч нафар қатнашчиси: Прагнанандҳа Рамешбабу, Видит Сантош Гуджрати ва Гукеш Доммараджу иштирокидаги 19-тоифадаги супертурнир. Улардан ташқари, Нодирбек Абдусатторов, Винсент Каймер, Риҳард Раппорт, Парҳам Магсудлу, ўн карра Чехия чемпиони Давид Навара, тўрт карра Польша чемпиони Матеуш Бартель, шунингдек, яна бир маҳаллий вакил Тай Дай Ван Нгуен ҳам ўйнамоқда.
Турнир ўртача 2710 иштирокчи рейтингига эга бўлган 19-тоифага эга бўлди (Вейк-ан-Зеедаги билан бир хил). Турнир давравий тарзда ўтказилади, 9 турдан иборат. Вақт назорати: 40 та юриш учун 90 дақиқа, сўнг ўйин охиригача 30 дақиқа + биринчисидан бошлаб ҳар бир юриш учун 30 сония.
Январь ойида Нодирбек Абдусатторов элита шахматчилари билан бирга Tata Steel Chess супертурнирида қатнашганди. У мусобақа давомида 13 турдан ортиқ ўйин ўтказиб, олтита ғалаба, бешта дуранг, иккита мағлубият қайд этганди. «Газета.uz» ушбу турнир ўзбекистонлик спортчи учун қандай кечгани ҳақида ёзган.
