2024 йил феврали ҳисобига кўра, Россияга қарши кенг кўламли уруш бошланганидан бери 31 минг украиналик ҳарбий ҳалок бўлди. Бу ҳақда якшанба куни бўлиб ўтган матбуот анжуманида Украина президенти Владимир Зеленский маълум қилди, деб ёзди «Украинская правда».
«Бу урушда 31 минг Украина аскари ҳалок бўлди. Путин ва унинг ёлғончи доиралари ёлғонларидагидек 300 минг, 150 минг эмас. Аммо бу йўқотишларнинг ҳар бири биз учун катта аҳамиятга эга», — деди Зеленский.
У украиналик ярадор аскарлар сонини очиқламади, чунки бу ҳолатда, унинг сўзларига кўра, Россия қанча одам «жанг майдонини тарк этганини» билиб олади. Бундан ташқари, у бедарак йўқолган аскарлар сонини ҳам ошкор қилмади.
«Биз, шунингдек, босиб олинган ҳудудларда ўлдирилган ўн минглаб украиналиклар ҳақида ҳам хабардормиз», — дея қўшимча қилди Зеленский.
Зеленский, шунингдек, Украина томонининг маълумотларига кўра, Россия томондан 180 мингга яқин аскар ҳалок бўлгани, қоплаб бўлмайдиган йўқотишлар эса ярим миллионга етганини айтди.
Украина расмийлари икки йиллик уруш давомида биринчи марта ҳалок бўлган украиналик ҳарбийларнинг аниқ сонини эълон қилмоқда.
- 2023 йил августида New York Times газетаси америкалик расмийларга таяниб, АҚШ разведка маълумотларига кўра, ўша вақтга келиб 70 мингга яқин украиналик аскар ҳалок бўлгани, яна 120 минг нафари яраланганини ёзган эди. Ўша пайтда Россия урушда 300 мингга яқин аскар йўқотган, жумладан, улардан 120 минг нафари ҳалок бўлган ва 180 минг нафари яраланган.
