АҚШ президенти Жо Байден бир неча кун олдин вафот этган россиялик мухолифатчи Алексей Навальнийнинг рафиқаси ва ишининг давомчиси Юлия Навальная ҳамда қизи Даша Навальнаялар билан учрашди. Сиёсатчи бу ҳақда ўзининг X`даги (собиқ Twitter) саҳифасида маълум қилди.
«Бугун мен Алексей Навальнийнинг яқинлари — Юлия ва Даша Навальнаялар билан уларнинг катта йўқотиши юзасидан ҳамдардлик билдириш учун учрашдим. Алексейнинг жасорат мероси Юлия, Даша ва Россия бўйлаб демократия ҳамда инсон ҳуқуқлари учун курашаётган сон-саноқсиз одамларда яшашда давом этади», — деб ёзди Қўшма Штатлар етакчиси.
CNN`нинг ёзишича, мазкур учрашувдан сўнг Байден АҚШ Навальнийнинг ўлими туфайли Путинга қарши санкциялар жорий қилишини билдирган.
«Мен унинг рафиқаси ва қизи билан учрашиш ва у (Навальний — таҳр.) ақл бовар қилмайдиган даражада жасоратли одам бўлганини айтиш шарафига муяссар бўлдим. Эртага биз унинг ўлимида айбдор бўлган Путинга қарши санкцияларни эълон қилишни режалаштирмоқдамиз», — деди Байден.
АҚШ президентининг қўшимча қилишича, учрашувда унга Навальнийнинг беваси «курашни давом эттириши» маълум бўлган.
Алексей Навальний колонияда вафот этгач, Байден баёнот бериб, сиёсатчининг ўлими учун Владимир Путин жавобгар эканини таъкидлаганди.
Шунингдек, Россиянинг Украинага қарши уруши бошланганидан сўнг АҚШ, Буюк Британия ва Европа Иттифоқи шахсан Путинга қарши санкциялар жорий этган.
