Буюк Британиядан Ўзбекистон, Қирғизистон, Грузия ва Арманистонга кейинчалик Россияга қайта йўл оладиган товарлар, жумладан, дронлар ва оғир техникалар учун ускуналар жўнатилмоқда, дейилади Sky News таҳлилида.
«Рақамлар шуни кўрсатадики, Россияга икки йил аввал Украинага бостириб кириши муносабати билан савдо санкциялари жорий этилганидан кейин товар оқими кескин қисқарганига қарамай, Британиянинг катта ҳажмдаги сезувчан, „икки хил мақсадда фойдаланса бўладиган“ товарлари ҳали ҳам Москвага йўл олмоқда», — дейилади ҳисоботда.
Буюк Британиянинг расмий савдо статистикаси таҳлили 2022 йил февраль ойидан буён Британиянинг Россияга оғир техника, электротехника ва автомобиллар экспорти деярли нолга тушиб кетганини кўрсатмоқда, шунга қарамай, Россиянинг бир қатор қўшни мамлакатлари — Грузиядан тортиб Ўзбекистонгача экспорт «ўта юқори темпда ўсган», — дея қайд этган Sky News.
Британиянинг Қирғизистон, Арманистон, Грузия ва Ўзбекистонга экспортининг ортиши. Инфографика: Sky News.
Шу тариқа, сўнгги икки йил ичида Британиядан Қирғизистонга экспорт 1100 фоиздан кўпроққа ошган. Экспорт таркибида ҳозирда тўғридан-тўғри Россияга жўнатиб бўлмайдиган оғир техника ва транспорт воситалари устунлик қилади.
Санкциялар киритилгандан сўнг Европа Иттифоқи АҚШ, Буюк Британия ва Япония билан биргаликда Украинадаги жанг майдонларидаги рус қуролларининг қолдиқларидан топилган 45 тоифадаги «умумий юқори устуворликка эга товарлар» рўйхатини тузди.
Sky News таҳлилига кўра, уруш бошланганидан бери ушбу товарларнинг Британиядан Ўзбекистон, Қирғизистон, Грузия ва Арманистонга экспорти 500 фоиздан кўпроққа ошган.
Буюк Британиядан Қирғизистон, Арманистон, Грузия ва Ўзбекистонга экспорт қилинадиган асосий товарлар. Инфографика: Sky News.
«Кавказ ва Марказий Осиёдаги ушбу тўртта давлатга жўнатилган товарларнинг энг катта тоифаси „самолётлар, вертолётлар ёки учувчисиз учиш аппаратларининг қисмлари“, яъни дрон ва бошқа авиацион воситаларни ясашда қўлланиши мумкин бўлган жиҳозлар бўлди», — дейилади материалда.
Умуман олганда, Sky News ҳисоб-китобларига кўра, Британия компаниялари ушбу тўртта давлатга 6 млн фунт стерлинглик маҳсулот экспорт қилган, бу улар урушдан олдин экспорт қилганидан кўпроқ.
Британиялик экспортчилар томонидан жўнатилган бошқа товарлар қаторига маълумотларни қайта ишлаш машиналари, аэронавигацион ускуналар ва радионавигация воситалари киради, дея қайд этган Sky News.
- Ўтган йилнинг октябрида The Bell Россияга қарши санксиялар жорий этилгач, Европа Иттифоқи давлатлари Россияга қўшни ва яқин давлатларга, жумладан, Ўзбекистонга маҳсулот етказиб бериш ҳажмини оширгани ҳақида ёзганди. Айни вақтда Россия ушбу мамлакатлардан импортни бир неча бор оширганди. Шу йўл билан Россия расмийлари Ғарб санкцияларини четлаб ўтаётган бўлиши мумкин, дея қайд этганди нашр.
