Ўзбекистонда ахборот технологиялари соҳасида ҳудудларга IT экспортчи ташкилотларни кенг жалб этишга қаратилган Zero Risk («Ноль риск») дастури жорий этилади. Бу ҳақда 22 февраль куни Шавкат Мирзиёевга кўрсатилган тақдимотда сўз боради, деб хабар берди президент матбуот хизмати.
Zero Risk дастури
Дастурда иштирок этувчи корхоналарга IT-парк тавсияномаси асосида бўш турган давлат бинолари 1 йилгача муддатга текин фойдаланишга берилади. Бу муддат тугагач, тўғридан-тўғри шартнома тузилади.
Бундан ташқари, IT-парк томонидан технология ва жиҳозлар 1 йилгача муддатга текин фойдаланишга берилади.
Мазкур корхоналар фаолиятини ривожлантириш учун ҳам қатор имтиёзлар берилади. Жумладан, дастур иштирокчиларининг ходимларни ишга олиш ва малакасини ошириш харажатлари 50 фоизгача қоплаб берилади.
Шавкат Мирзиёев.
Local to Global дастури
Шунингдек, маҳаллий IT компанияларига жаҳон бозорига киришда ёрдам бериш учун Local to Global («Маҳаллийдан глобалгача») дастурини амалга ошириш режалаштирилган.
Ушбу мақсадлар учун, жумладан, халқаро кўргазмаларда иштирок этиш ва хорижий экспертларни таклиф қилиш учун харажатларнинг 50 фоизгача қисми қоплаб берилади.
«Рақамли инклюзивлик» лойиҳаси
Президентга «рақамли инклюзивлик» лойиҳаси ҳақида ҳам маълумот берилди. «Газета.uz» ёзганидек, лойиҳа Жаҳон банки кўмагида амалга оширилмоқда, у ўтган йилнинг ноябрь ойида 50 миллион доллар миқдорида имтиёзли кредит ажратган.
Мазкур лойиҳа доирасида ёшлар, аёллар ва имконияти чекланган шахслар IT хизмат кўрсатиш кўникмаларига ўргатилади.
9 минг иш ўрни яратиш, жумладан, 5 минг нафарга яқин аёллар ва ногиронлиги бўлган шахсларнинг бандлигини таъминлаш режалаштирилган.
Умуман, «рақамли инклюзивлик» лойиҳасини амалга ошириш натижасида 25 минг киши иш билан таъминланиши кутилмоқда.
Ҳозирги кунда IT-парк резидентлари сони 1700 нафарга етди, уларда 26 минг нафар ходим ишлайди.
«Ўзбекистон-2030» стратегиясида резидентлар сонини 7500 нафарга, иш ўринларини 100 минг нафарга етказиш, шунингдек, соҳада экспорт ҳажмини 5 миллиард долларга олиб чиқиш кўзда тутилган.
