АҚШ Ғазо секторида ўт очишни вақтинча тўхтатиш ва Исроилнинг Рафаҳ шаҳрида амалга оширишни режалашган қуруқликдаги операцияси оқибатларидан огоҳлантирувчи БМТ резолюцияси лойиҳасини тайёрлади. Бу ҳақда ҳужжатга таяниб Guardian ёзмоқда.
АҚШ биринчи марта Исроил ва ХАМАС ўртасидаги можарода ўт очишни тўхтатишни очиқча қўллаб-қувватлади. Аммо ҳужжат лойиҳасида вақтинчалик сулҳ «имкон қадар тезроқ» бошланиши кераклиги кўрсатилган. Бу Исроил ҳарбийларига манёвр қилиш (қўшинларнинг душманга талафот етказиш учун қулай бўлган куч ва воситалар гуруҳини тузиш мақсадидаги ҳаракатлари — таҳр.) учун имкон қолдиради, дейилади хабарда.
Резолюция матнида таъкидланишича, Исроилнинг Рафаҳга режалаштирган ҳужуми «тинч аҳолига янада кўпроқ зарар етказиши ва уларнинг, жумладан, қўшни давлатларга кўчиб кетишига олиб келади, бу эса минтақа тинчлиги ва хавфсизлиги учун жиддий оқибатларга олиб келади».
АҚШ, шунингдек, ХАМАСни 2023 йил 7 октябрда Исроилга қилган ҳужуми учун қоралади. Аввалроқ АҚШнинг БМТдаги миссияси Хавфсизлик кенгашининг аввалги резолюцияларида Фаластин гуруҳига нисбатан аниқ айбловлар мавжуд эмаслигидан норози бўлган эди.
Reuters агентлигининг қайд этишича, ҳужжат Қўшма Штатларнинг Жазоир томонидан зудлик билан ўт очишни тўхтатиш талаби натижасида тайёрланган резолюцияга вето қўйиши ҳақидаги сигналлари ортидан киритилмоқда. АҚШ расмийлари резолюция Қўшма Штатлар, Миср, Исроил ва Қатар ўртасидаги гаровга олинганларни озод қилиш ва урушни тўхтатиб туриш бўйича музокараларга путур етказиши мумкинлигидан хавотирда.
АҚШ маъмурияти вакилининг Reuters агентлигига маълум қилишича, АҚШ «шошилинч овоз бериш»ни режалаштирмаяпти ва БМТ Хавфсизлик кенгаши аъзоларига музокаралар учун вақт бермоқчи. Резолюцияни қабул қилиш учун уни камида тўққиз мамлакат ёқлаб овоз бериши ва АҚШ, Франция, Буюк Британия, Россия ёки Хитой давлатларидан бири унга вето қўймаслиги керак.
Бунгача АҚШ икки марта БМТнинг бошқа давлатлар томонидан зудлик билан ўт очишни тўхтатиш талаб қилинган резолюцияларини блоклаган. Бироқ Вашингтон Исроилнинг, турли манбаларга кўра, 1,5 миллионга яқин фаластинлик қочқинлар бошпана олаётган Рафаҳдаги ҳарбий операциясига қарши. АҚШ президенти Жо Байден аввалроқ Исроил бош вазири Биньямин Нетаньяхуни шаҳарга ҳужум уюштирмасликка чақирган эди.
Guardian ва Reuters`нинг ёзишича, АҚШ резолюцияси матни Байденнинг изоҳларига мос келади. Аммо ҳужжат АҚШнинг Рафаҳ масаласида Исроилга босим ўтказиш учун БМТ орқали боришга тайёрлигини ва фақат икки томонлама алоқаларга таяниб қолмаслигини кўрсатади, дея таъкидлайди Guardian.
БМТ Халқаро инқироз гуруҳи директори Ричард Гоуэннинг Reuters агентлигига айтишича, Исроил Вашингтон тайёрлаган резолюциядан хавотирда.
«Умуман олганда, оддий факт шундан иборатки, АҚШ ушбу матнни киритаётгани Нетаньяху учун огоҳлантирувчи зарбадир, деди у. — Бу Қўшма Штатларнинг БМТга Исроил Америка дипломатик ҳимоясига чексиз таяна олмаслиги ҳақида юборган энг кучли сигналидир».
