Европа Иттифоқи мамлакатлари элчилари Россияга қарши санкцияларнинг 13-пакети бўйича келишиб олди, деб хабар қилди Бельгиянинг ЕИ Кенгашидаги ваколатхонаси.
«Бу ЕИ томонидан тасдиқланган энг кенг қамровли пакетлардан биридир», — дея аниқлик киритди ваколатхона. Пакет 24 февраль куни Россиянинг Украинага босқини икки йиллиги муносабати билан расман тасдиқланади.
Европа дипломатияси раҳбари Жозеп Боррелнинг таъкидлашича, ЕИ санкциялар рўйхатига 200 нафар жисмоний ва юридик шахсларни киритади. «Ушбу пакет билан биз мудофаа ва ҳарбий соҳаларда санкциялардан бўйин товлаш билан шуғулланувчи ташкилотларга нисбатан кўпроқ чора кўрамиз», — деди у.
Reuters агентлиги манбаларга таяниб ёзишича, санкциялар Россия ҳарбий-саноат мажмуасига кирувчи ҳамда украиналик болаларни ўғирлашда иштирок этган компаниялар ва шахсларни ўз ичига олади. Шу билан бирга, агентликнинг таъкидлашича, пакетда янги тармоқ чора-тадбирлари мавжуд эмас.
Санкциялар, шунингдек, Россия армияси учун харидлар тармоғига, хусусан, дронлар ишлаб чиқариш бўйича етказиб бериш тизимига ҳам таъсир қилади, дея аниқлик киритди Reuters. Рўйхатга Россия Федерацияси компанияларидан ташқари, Хитойнинг учта, Гонконгнинг битта компанияси ҳам киритилди.
Еврокомиссия раҳбари Урсула фон дер Ляйен эришилган келишувни изоҳлар экан, «Биз Путиннинг уруш машинасини заифлаштиришда давом этишимиз керак», — деб ёзди.
ЕИнинг Россияга қарши санкцияларининг 12-пакети 2023 йил декабрида қабул қилинган эди. У Россиядан заргарлик буюмлари олмосларини олиб кириш, шунингдек, ўта нозик товарлар ва технологияларни реэкспорт қилишни тақиқлашни ўз ичига олган.
