Европарламент ва Европа Иттифоқига аъзо давлатлар ҳаво сифати стандартларини кучайтириш бўйича келишувга эришди, деб хабар бермоқда Reuters.
Янги қоидалар ҳавони ифлослантирувчи моддаларнинг Жаҳон соғлиқни сақлаш ташкилоти (ЖССТ) тавсияларига яқин бўлган чегараларни белгилайди.
Ўтган йилнинг ноябрь ойида Европа атроф-муҳит агентлиги 2021 йилда ЕИда 253 минг кишининг ўлимига майда заррачалар (PM2,5) оқибатида юзага келган ифлосланиш сабаб бўлганини маълум қилганди. Қандли диабет билан касалланган одамлар учун энг зарарли бўлган азот диоксиди (NO2) ифлосланиши 52 минг кишининг, озоннинг қисқа муддатли таъсири (О3) 22 минг кишининг ўлимига сабаб бўлган.
Дастлабки келишувга кўра, 2030 йилгача PM2,5 зарраларининг ўртача йиллик консентрацияси 25 мкг/м3 дан 10 мкг/м3 гача, NO2 ники эса 40 мкг/м3 дан 20 мкг/м3 гача пасайтирилади.
Ҳужжат ЕИга аъзо давлатларга жиддий сабаблар бўлса, 2029 йил 31 январгача стандартларга эришишни кечиктиришни сўраш имкониятини беради.
Энди келишув Европарламент ва ЕИ Кенгаши томонидан расман тасдиқланиши, кейин эса қабул қилиш жараёнидан ўтиши керак.
Аввалроқ АҚШда ҳам ҳаво сифати стандартлари кучайтирилганди. Мамлакатда PM2,5 нинг рухсат этилган ўртача йиллик концентрацияси 12 мкг/м3 дан 9 мкг/м3 гача камайтирилган.
