Батирбек Тулепбергенович Каипбергенов Қорақалпоғистон Республикаси олий таълим, фан ва инновациялар вазири лавозимига тайинланди. Бу ҳақда Жўқорғи Кенгес матбуот хизмати маълум қилди.
Каипбергенов 1970 йилда Нукусда туғилган. 1992 йилда Тошкент давлат техника университети, 1998 йилда эса Президент ҳузуридаги Давлат ва жамият қурилиши академиясини битирган, техника фанлари доктори саналади.
2004 йилда «Ўзбекистон белгиси» кўкрак нишони билан тақдирланган.
У шу кунга қадар Тошкент ахборот технологиялари университети Нукус филиали директори лавозимида ишлаб келган.
Маълумот учун, Батирбек Каипбергенов Қорақалпоғистон ва Ўзбекистон халқ ёзувчиси, Ўзбекистон қаҳрамони Тулепберген Каипбергеновнинг ўғли ҳисобланади.
