Жиноят ишлари бўйича Тошкент шаҳри суди «Док-1 Макс» сиропи бўйича ишни кўриб чиқишни якунламоқда. 5 февраль куни суд тергови якунланиб, музокарага ўтилди.
12 февраль куни бўлиб ўтган музокарада прокурор суддан (раиси Мусо Юсупов) Фармацевтика тармоғини ривожлантириш агентлигининг собиқ директори ҳамда Дори воситалари, тиббий буюмлар ва тиббий техника экспертизаси ва стандартлаштириш давлат маркази собиқ раҳбари Сардор Кариевга нисбатан 18 йилга озодликдан маҳрум этиш бўйича ҳукм чиқаришни сўради. Бу ҳақда «Дарё» хабар бермоқда.
Давлат айбловчиси марказнинг собиқ биринчи ўринбосари ва директор ўринбосари А.А. ва M.Н.гa ҳам худди шундай муддат сўради.
Шунингдек, прокурор уларни 3 йил муддатга моддий жавобгарлик ва мансабдорлик лавозимларни эгаллаш ҳуқуқидан маҳрум қилишни сўради.
Бундан ташқари, у Quramax Medikal`нинг собиқ директори Рагвендра Пратарни (Singh Ragvendra Pratar) 20 йилга озодликдан маҳрум қилишни, жазо умумий тартибли колонияда ўталишини сўради.
Давлат айбловчиси суддан ҳалок бўлган 68 нафар боланинг қариндошлари ва оғир жароҳат олган 16 нафар боланинг қариндошлари учун 100 миллион сўм (8,4 миллиард сўм), шунингдек, енгил жароҳат олган 2 нафар бола учун 20 миллион сўм ундиришни сўради.
Эслатиб ўтамиз, 11 август куни Жиноят ишлари бўйича Тошкент шаҳри суди Ўзбекистонда Ҳиндистоннинг Marion Biotech фармацевтика компанияси дорилари, жумладан, «Док-1 Макс» йўтал сиропини қабул қилиш оқибатида камида 69 нафар бола вафот этгани билан боғлиқ жиноят ишини кўриб чиқишни бошлаган эди. Судланувчилар 23 кишини (18 эркак ва 5 аёл) ташкил этган.
«Док-1 Макс» иши кўрилаётган суд залидан «Газета.uz»нинг батафсил репортажлари билан ушбу ҳавола орқали танишиш мумкин.
