Исроил ҳукумати мамлакатдаги қурилиш ишларига Ўзбекистон, Ҳиндистон ва Шри-Ланка фуқароларини жалб қилмоқчи. Бу ҳақда Reuters`га таяниб Spot нашри ёзмоқда.
Расмийлар хорижлик муҳожирлардан фойдаланиб, сўнгги ойларда соҳада шаклланган ишчи кучи танқислигини бартараф этмоқчи. Ҳозирда қурилиш майдончаларида атиги 20 минг хорижлик ишламоқда, шу сабабли майдонларнинг ярмида ишлар тўхтатилган.
Умумий ҳисобда, учта мамлакатдан 65 минг меҳнат муҳожирини жалб этиш режалаштирилган. Исроил Уй-жой вазирлиги маълумотларига кўра, хорижий ишчиларнинг биринчи гуруҳлари яқин ҳафталарда келиши кутилмоқда.
Янги ишчилар қурилиш объектларида кадрлар етишмаслиги муаммосини ҳал қилишлари керак. Ҳукумат акс ҳолда, ҳатто ипотека кредити ставкалари камайиб бораётган шароитда, мамлакатда уй-жой нархларида ўсиш юзага келишидан қўрқмоқда.
Яқин вақтгача Исроил қурилиш майдонларида 72 мингга яқин фаластинлик ишлаган. Бироқ октябрь ойида Ғазодаги можаро авж ола бошлаганидан сўнг, Исроил хавфсизлик идоралари уларнинг ишлаш рухсатномаларини тўхтатиб қўйган.
2022 йил ёзида Ўзбекистон ва Исроил ҳукуматлари ўртасида ўзбекистонлик ишчиларни Исроил меҳнат бозорининг махсус секторларида вақтинча иш билан таъминлаш тўғрисида битим имзоланганди.
Аввалроқ, шунингдек, ўзбекистонликлар учун Жанубий Кореядаги ишлаб чиқариш, қишлоқ хўжалиги, хизмат кўрсатиш ва қурилиш соҳасида 37,4 мингта иш ўрни учун танлов ўтказилиши хабар қилинганди. Таклиф этилаётган соҳаларда ойлик маош ўртача 2000−2500 минг АҚШ долларини ташкил этиши кутилмоқда.
