Футбол бўйича Ўзбекистон МТЖ ҳужумчиси Жалолиддин Машарипов фаолиятини Эроннинг «Истиқлол» клубида давом эттиради. Бу ҳақда ЎФА ҳамда футболчининг янги клуби маълум қилди.
«Истиқлол» клуби спортчи билан 1,5 йиллик шартномага келишиб олганини билдирди, у 10-рақам остида тўп суради.
«Томонлар ушбу шартнома лойиҳасини имзолади ва Жалолиддин Машарипов яқин икки-уч кун ичида Теҳронга келиб, тиббий кўрикдан ўтади ва якуний шартномани имзолайди», — дейилади хабарда.
«Истиқлол» Эрон чемпионатида 15-турдан сўнг 32 очко жамғариб, биринчи ўринда бормоқда.
Футболчининг Самвел Бабаян бошчилигидаги «Навбаҳор» клубига ўтиши мумкинлиги ҳам айтилаётганди.
Эслатиб ўтамиз, Машарипов 2023 йил сентябрь ойида Греция чемпионати олий лигасидаги «Пансерраикос» футбол клубига эркин агент сифатида кўчиб ўтганди ва бир неча кун олдин уни тарк эди. Спортчи жамоа сафида жами 8 та ўйинда иштирок этди ва 2 ассистни ўз номига ёздириб қўйди, шунингдек, битта сариқ карточка олди.
Ундан аввал футболчи Португалия терма жамоаси ҳужумчиси Криштиану Роналду ўйнайдиган Саудия Арабистонининг «Ан-Наср» клубида тўп сурган. Ўзбекистонлик футболчи ушбу клубда 68 та ўйинда майдонга тушиб, 5 та гол урган ва 17 та голли узатмани амалга оширган. 2023 йил август ойида томонлар шартномани бекор қилишга қарор қилди, шундан сўнг футболчи эркин агентга айланган.
Бунгача эса Тошкентнинг «Пахтакор» ва «Локомотив» клубларида жами 200 дан ортиқ ўйин ўтказиб, 42 та гол урган, 60 та голга ассистентлик қилган ва 5 марта Ўзбекистон чемпионлиги ҳамда 2 марта Ўзбекистон кубогини қўлга киритган.
2020 йилда у Осиё чемпионлар лигасининг энг яхши ярим ҳимоячиси, шунингдек, Ўзбекистоннинг энг яхши футболчиси сифатида эътироф этилган.
У 2016 йилдан буён Ўзбекистон миллий терма жамоаси сафида 61 та ўйин ўтказиб, 12 та гол урган.
