Футбол бўйича Ўзбекистон миллий терма жамоаси бош мураббийи Сречко Катанец Осиё кубоги чорак финалида Қатардан учралган мағлубиятдан сўнг (1:1, пенальтилар сериясида 2:3) учрашув якунлари ҳақида фикр билдирди.
«Бу — қайғули лаҳза. Буни қабул қилишимиз керак, бу — футболнинг бир қисми. Ростини айтсам, нега кимдир хафа бўлиши кераклигини тушунмаяпман. Биздаги барча муаммоларни (асосий ўйинчиларнинг жароҳатлари — таҳр.) инобатга олсак, Осиё кубогида яхши ўйнадик. Менимча, Қатарга қарши ўйинда биз яхшироқ ўйнаган жамоа бўлдик, шунчаки гол ура олмадик. Кўпроқ вазиятлар ярата олдик, ҳужумчиларсиз ҳам кўпроқ зарба бера олдик. Пенальтилар серияси ҳар доим қийин, руҳий жиҳатдан кучли бўлиш керак, биз бундай эмасдик. Айтмоқчиманки, футболчилар ўзларига кўпроқ ишониши керак, чунки улар 100 фоиз эмас, 120 фоизли кўрсаткични беришди», — деди у Championat Asia нашрига берган интервьюсида.
Катанец натижадан хафа эмаслигини айтди, чунки «бу — футбол».
Жамоа ярим финалга чиқа олмагани учун Футбол ассоциацияси билан муаммолар бўлиш-бўлмаслиги ва унинг ўз лавозимида қолиши ҳақидаги саволга бош мураббий кулиб, шундай жавоб берди: «Ҳазиллашяпсизми? Катта раҳмат». Шундан сўнг у журналистни тарк этди.
Эслатиб ўтамиз, миллий терма жамоа Катанец бошчилигида 10 та ўйин ўтказиб, 6 та ғалаба қозонган, 3 та дуранг ўйнаган, 21 та гол урган ва 6 та ўтказиб юборган. Ягона мағлубият Қатарга қарши ўйинда пенальтилар сериясида қайд этилди.
