Европа кенгаши президенти Шарль Мишель июль ойида бўлиб ўтадиган Европарламент сайловларида иштирок этиш ниятида эканини маълум қилди. У ўз қарори ҳақида Бельгиянинг De Standaard, Le Soir ва La Libre газеталарини хабардор қилди, деб ёзмоқда «Медуза».
«Мен 2024 йилги Европа сайловларида номзод сифатида қатнашишга қарор қилдим. Агар сайлансам, июль ойи ўрталарида Европарламент аъзоси сифатида қасамёд қилгунимга қадар Европа кенгаши президенти бўлиб ишлайман», — дея бельгиялик сиёсатчининг сўзларини келтиради De Standaard.
2019 йил 1 декабрдан бери мазкур лавозимда ишлаб келаётган 49 ёшли Мишелнинг Европа кенгаши президенти сифатидаги ваколати 2024 йилнинг ноябрида тугайди, Европа парламентига сайловлар эса июль ойида бўлиб ўтади. Бир пайтда Европа кенгаши раҳбари ва Европарламент аъзоси лавозимларини эгаллаш мумкин эмаслиги сабабли, Мишель сайланса, ўз лавозимини муддатидан аввал тарк этади.
Ўз навбатида, Politico нашрининг таъкидлашича, Мишелнинг қарори Европа етакчиларига қўшимча босим келтириб чиқаради, чунки улар одатдагидан қисқароқ вақт ичида унинг вориси ҳақида келишиб олишлари керак. Агар бу амалга ошмаса, Европа кенгашига раҳбарлик вақтинча Венгрия бош вазири Виктор Орбанга ўтади, чунки Венгрия 2024 йил июлидан декабригача ЕИ кенгашига раислик қилади.
Виктор Орбан Украинага ҳарбий ёрдам кўрсатишга доимий равишда қарши бўлиб келмоқда. Хусусан, декабрь ойида Венгрия бош вазири Европа Иттифоқининг Украинага 50 миллиард евро миқдорида иқтисодий ёрдам ажратиш ҳақидаги қарорига вето қўйганди. Шунингдек, у Украинанинг ЕИга кириши бўйича музокаралар бошланишига қарши чиққан.
