Тошкент марказидаги Матбуот уйида бошланган реконструкция ишлари 2026 йилда якунланиши режалаштирилган. Бу ҳақда уни реконструкция қилувчи пудратчи ташкилот «Yangi Zamon Binо» компанияси эълонида келтирилган. Шунингдек, шаҳар ҳокимлиги ҳузуридаги «Ягона буюртмачи хизмати компанияси» унитар корхонаси техник назоратчиси «Газета.uz»га мухбирига маълум қилди.
Бинонинг реконструкциядан аввалги ташқи кўриниши. Фото: The Mag
Реконструкция ишлари, бинода фаолият олиб борган таҳририятлар кўчиб чиққач, 2023 йил октябрида бошланган. Давлат бюджети ҳисобидан амалга оширилаётган салкам 99 млрд сўмлик таъмир 2023 йил ноябрида аниқланган тендер ғолиби — «Yangi Zamon Binо» компанияси томонидан амалга ошириляпти. Режага кўра, бино ва унга туташ ҳудудда медиа-шаҳарча бунёд этилади.
Бинонинг ҳозирги кўриниши. Фото: «Газета.uz»
Техник назоратчи Жасур Исматуллаевнинг таъкидлашича, Матбуот уйи биноси маданий мерос объекти эмас, шу боис уни тўлиқ бузиш ҳам мумкин эди. Ҳозирда бинода демонтаж ишлари давом этяпти, аммо бу унинг тўлиқ бузилишини англатмайди — Матбуот уйининг фасад қисмига янгидан ишлов берилиб, у ойнаванд бинога айлантирилади.
Лойиҳа бўйича, Матбуот уйининг таъмирдан кейинги кўриниши. Сурат: The Mag
«The Mag» нашрининг ёзишича, реконструкция давомида етти қаватли бино саккиз қаватга айлантирилади. Таъмирлаш ишлари якунига етгач, дастлабки уч қаватни бино эгаси ҳисобланган Ўзбекистон Миллий ахборот агентлиги (ЎзА) эгаллайди, 4−6-қаватларга «Халқ сўзи», «Народное слово», «Янги Ўзбекистон», «Правда Востока», «Нурли жўл», «Овози тожик» газеталари жойлашади. Бинода конференц-зал, ёзги медиа-шаҳарча, кутубхона-музей, тренажёр зали, инновацион студия ҳам пайдо бўлади.
Матбуот уйининг сотувга қўйилиши
Матбуот уйи биринчи марта 2018 йил баҳорида кимошди савдосига қўйилганди. Ўшанда объектнинг бошланғич баҳоси 18,7 млрд сўм этиб белгиланган эди. Кейинчалик, жамоатчилик эътирозидан сўнг, лот кимошди савдосидан олиб ташланган.
2021 йил августида бино яна сотувга қўйилгани маълум бўлди. Аммо яна жамоатчилик эътирозидан сўнг, бино таҳририятлар ихтиёрида қолдириладиган бўлди. Кўп ўтмай, бино ЎзА балансига ўтказилди.
