Шавкат Мирзиёев Хитойга давлат ташрифининг ишбилармонлик дастури давомида CNPC нефть-газ корпорацияси раиси Дай Хоулянни қабул қилди, дея хабар берди президент матбуот хизмати.
Учрашувда Ўзбекистонда ерости газ сақлаш сиғимларини барпо этиш ва газ етказиш тизимларини модернизация қилиш, замонавий бурғилаш технологияларини жорий қилиш ва нефть-газ тармоғи учун мутахассислар тайёрлаш бўйича истиқболли лойиҳаларни амалга ошириш масалалари муҳокама қилинди.
Хитой миллий нефть-газ корпорацияси «Fortune Global 500» рейтингида киради. Компания нефть ва газ қазиб олиш бўйича, шу жумладан, хорижий мамлакатларда йирик лойиҳаларни амалга оширган.
2017 йили CNPC шуъба компанияси ҳисобланган CNODC ва «Ўзбекнефтгаз» иштирокидаги New Silk Road Oil And Gas корхонаси Бухоро вилоятидаги газ конденсати конини жиҳозлашга киришганди.
2013 йилнинг сентябрида «Ўзбекнефтгаз» ва CNODC Қорақўл инвестицион блоки конини қўшимча разведка қилиш ва қазиб олишни бошлаш бўйича корхона ташкил этганди. Қоракўл блокида олиб борилган геологик разведка ишлари натижасида аниқланган Хўжадавлат, Шарқий Олот ва Денгизкўл конининг Хўжасаят участкаларидаги газ-конденсат конлари мазкур корхона учун хом ашё базаси ҳисобланади.
2017 йилда корхона лицензион майдонида конни жиҳозлаш ҳамда 16 та эксплуатацион қудуқ қуриш, бир йилда 1 миллиард куб метргача табиий газ ва 6500 тонна конденсат қизиб олиш режелаштирилаётгани хабар қилинганди.
Ўшанда холдинг вакили CNPC Хитой банклари билан лойиҳани молиялаштириш бўйича кредит шартномасини имзолаганини маълум қилганди. Лойиҳа қиймати 378 млн доллар бўлиб, корхона маблағлари ҳамда CNPC кафолати остидаги Хитой кредитлари ҳисобига молиялаштирилиши таъкидланган.
