Президент Шавкат Мирзиёевнинг Хитойга давлат ташрифи арафасида (23−25 январь) «Жэньминь жибао» газетасида Ўзбекистон ва ХХР муносабатларининг истиқболларига бағишланган фикр-мулоҳазалари эълон қилинди.
«Ўзбекистон Хитойнинг муваффақиятларидан чин дилдан мамнун»
«Янги йилнинг биринчи ойи ҳар доим энг яқин дўстлар билан учрашиш, янги умидлар ва марралар вақтидир. Хитой халқ Республикасининг муҳтарам президенти Си Цзиньпиннинг таклифига биноан бу йил биринчи ташрифимни Хитойга амалга оширишим чуқур рамзий маънога эга», — дейилади мақолада.
Шавкат Мирзиёев Хитойга ҳар сафар ташриф буюрганида «бу ерда амалга оширилаётган ислоҳотлар кўлами ва муваффақиятлар, бунёдкорлик кучи, меҳнатсеварлиги ва кўп асрлик орзусини рўёбга чиқариш учун модернизация йўлидан дадил бораётган Хитой халқининг истеъдодига чин дилдан қойил қолишини» таъкидлади.
«Ўтган ўн йил ичида Хитой Халқ Республикаси жаҳоннинг қудратли давлатига айланди, улкан илмий-техникавий ва инновацион тараққиётга эришди, иқтисодиёт ва бизнесни ривожлантириш учун ноёб экотизим яратди. Мамлакат бутунлай янги қиёфа касб этди, халқ фаровонлиги муттасил юксалмоқда, ХХРни янада ривожлантириш учун мустаҳкам интеллектуал пойдевор шакллантирилмоқда», — дейилади мақолада.
«Бугун Хитой муҳим халқаро жараёнларнинг масъулиятли иштирокчиси сифатида жаҳон сиёсати ва бошқарувида етакчи ўринни эгаллаб турибди. Президент Си Цзиньпиннинг тараққиёт, хавфсизлик ва цивилизациялараро мулоқот соҳаларидаги глобал ташаббуслари глобал муаммоларни ҳал этишга, янада барқарор ва инклюзив келажакка ўтишни жадаллаштиришга салмоқли ҳисса қўшмоқда. ХХР савдо ва сармоявий ҳамкорликни кенгайтириш ва инфратузилмани бирлаштириш лойиҳаларини амалга ошириш орқали ривожланаётган мамлакатларнинг иқтисодий ўсишини қўллаб-қувватлашда катта иштирок этмоқда», — дейилади хабарда.
«Ўзбекистон Хитойнинг дўстона қўшниси ва ҳар томонлама стратегик ҳамкори сифатида бу муваффақиятлардан чин дилдан мамнун. Хитой билан кўп қиррали муносабатларни ривожлантириш Ўзбекистон ташқи сиёсатининг асосий устувор йўналишларидан бири бўлиб келган ва шундай бўлиб қолади», — дея қайд этган Шавкат Мирзиёев.
Ўзаро муносабатлардаги энг яхши давр
Ҳозирда икки давлат ўртасидаги муносабатлар «ўз тарихидаги энг яхши даврни бошдан кечирмоқда, изчил юқори динамикани намойиш этмоқда», дея қўшимча қилди у.
Ўзбекистон ва Хитой «минтақавий ва халқаро хавфсизликни таъминлаш, Бирлашган Миллатлар ташкилотининг Марказий ролига содиқлик ва глобал муаммоларни бартараф этиш ва барқарор ривожланиш мақсадларига эришишда кўп томонлама ҳамкорлик қилиш истагини» қўллаб-қувватламоқда.
«Биз мамлакатларимизнинг асосий манфаатларига дахлдор бўлган давлат суверенитети, ҳудудий яхлитлиги, яхши қўшничилик тамойилларига содиқлик, ўз тараққиёт йўлимиз ва маданий-цивилизациявий ўзига хосликни ҳурмат қилиш каби масалаларда бир-биримизни қатъий қўллаб-қувватлаймиз», — деди президент.
«Мамлакатларимизнинг кўп қиррали ҳамкорлиги халқаро майдондаги дўстлик ва ўзаро ёрдамнинг ёрқин намунасидир. Ўзбекистон Хитойнинг глобал бирлаштирувчи кучга айланган „Бир макон, бир йўл“ ташаббусини амалга ошириш доирасида турли дастурларда фаол иштирок этмоқда», — дея таъкидлади Шавкат Мирзиёев.
«10 йил ичида Буюк Ипак йўлини қайта тиклаш бўйича ушбу улуғвор ғоя сайёрамизнинг барча бурчакларида ўз тарафдорларини тўплади ва дунё давлатларининг учдан икки қисмини бирлаштирди. Бугунги кунда у жозибали концепциядан амалий ҳақиқатга айланмоқда. У цивилизациявий, иқтисодий ва маданий тафовутлар асосидаги ажратувчи чегаралардан воз кечиб, давлатлараро мулоқот ва ҳамкорликни мустаҳкамлашнинг мутлақо янги формуласини кашф этди, бу умумий фаровонлик йўлида инсоният саъй-ҳаракатларини максимал даражада бирлаштириш имконини беради», — деб ёзган давлат раҳбари.
Ўзбекистон учун «Бир макон, бир йўл» фақатгина инфратузилма лойиҳаси эмас. Ташаббусни биргаликда амалга ошириш туфайли минтақа узоқ масофаларини енгиб ўтиб, глобал ўзаро боғлиқликнинг муҳим бўғинига айланади", — деди у.
«Жаҳон сиёсатидаги беқарорлик ва нотинчликка қарамай, биз келажакка дадил назар ташлаб, биргаликда ижодий режалар тузамиз. Хитой Халқ Республикасининг ҳурматли раиси Си Цзиньпин билан бўлажак учрашувда айнан шу ҳақда гаплашамиз», — деди президент.
«Узоқ муддатли янги режалар»
Шавкат Мирзиёев «Келгуси ўн йилликларга мўлжалланган кўп қиррали ҳамкорликнинг асосий вазифаларини амалга ошириш бўйича янги узоқ муддатли кун тартиби ва дастурларни ишлаб чиқиш» муҳимлигини таъкидлади ва вазифаларни санаб ўтди.
1. Глобал цивилизациялараро мулоқотни мустаҳкамлаш. Тинчлик ва барқарорликни мустаҳкамлаш учун зарур шарт-шароитларни яратишга, энг долзарб масалалар бўйича ўзаро мақбул муросаларни излашга ҳеч нарса тўсқинлик қилмаслиги керак.
2. Муносабатларни «сифат жиҳатдан янги ва юқори даражага» олиб чиқиш. Бугун дунёда кечаётган жараёнларнинг мураккаблиги ва динамикаси Ўзбекистон-Хитой ҳамкорлигининг бутун спектри бўйича мунтазам фикр алмашиш ва яқин ҳамкорликни тақозо этмоқда. Мамлакатларимизни Марказий Осиё минтақасида ва бутун ШҲТ маконида барқарорлик ва хавфсизликни таъминлаш, жумладан, Афғонистондаги мавжуд вазиятнинг салбий оқибатларини бартараф этиш истаги бирлаштиради".
3. Энергетика, озиқ-овқат ва экологик инқирозларнинг кучайиши билан боғлиқ барқарор ривожланишнинг янги муаммолари шароитида кенг қамровли савдо-иқтисодий ҳамкорлик суръатларини сақлаб қолиш ва ошириш. Яқин келажакда Ўзбекистонда хитойлик ҳамкорлар иштирокида сув, электр энергетика, автомобиль ва темир йўл соҳаларида йирик инфратузилма лойиҳаларини амалга ошириш бўйича узоқ муддатли дастурни тасдиқлаш режалаштирилган.
4. Хитойнинг «Бир макон, бир йўл» ташаббуси доирасида икки давлат ташқи иқтисодий фаолияти учун транспорт-логистика инфратузилмасини ривожлантириш.
«Хитой ва Марказий Осиё ўртасида жаҳон бозорига чиқиш имкониятига эга бўлган юк ва йўловчиларни ташиш учун кўп вариантли мултимодал йўналишлар тизимини ривожлантириш, янги терминаллар яратиш, юқори технологияли ишлаб чиқариш ва омборхоналар қуриш ва йўл бўйидаги хизматлар учун интеграциялашган инфратузилма, логистикани рақамлаштириш тарихий Буюк Ипак йўли бўйлаб қитъа ичидаги алоқаларни ривожлантиришда муҳим ҳисса бўлади»
5. Ўзбекистон-Хитой дўстлигини мустаҳкамлашда халқ дипломатиясининг аҳамияти катта. «Биз маданий-гуманитар алмашинувни, таълим, соғлиқни сақлаш, спорт, туризм ва археология соҳаларида ҳамкорликни ривожлантириш учун мустаҳкам институционал асосларни яратдик. Бу умумий бойлик, халқларимиз ўртасидаги ўзаро англашувнинг бузилмас пойдеворига айланди».
Эслатиб ўтамиз, 2022 йил сентябрь ойида «Газета.uz» Хитой Халқ Республикаси Раиси Си Цзиньпиннинг Ўзбекистонга давлат ташрифи арафасида билдирган фикр-мулоҳазаларини эълон қилганди.
