Ўзбекистонда 1 мартдан бошлаб қишлоқ хўжалигига мўлжалланган ер участкалари электрон онлайн аукцион савдолари орқали ижарага берилади. Бу Шавкат Мирзиёевнинг 18 январдаги қарорида кўзда тутилган.
2021 йил 1 августдан бошлаб қишлоқ хўжалиги ерларини очиқ электрон танлов орқали фақат ижара ҳуқуқи асосида беришга рухсат берилганди.
Фармонга мувофиқ, қишлоқ хўжалигига мўлжалланган ер участкалари 30 йил муддатга ижарага берилади. Бунда бошланғич нарх ер участкасининг норматив қиймати миқдорида белгиланади.
Онлайн аукцион ғолибларига ер участкасининг нархини уч йил муддатда ҳар ойда тенг улушларда бўлиб-бўлиб тўлашга руҳсат берилади.
Деҳқон хўжалиги, якка тартибда боғдорчилик, полизчилик ва чорвачиликни юритиш учун ер участкаларини ижарага бериш бўйича электрон онлайн аукцион савдолари ғолиби бўлган «темир», «аёллар» ва «ёшлар» дафтарларига киритилган фуқароларга ер участкаси нархини беш йил муддатга тенг улушларда фоизсиз бўлиб-бўлиб тўлашга рухсат берилади.
Электрон онлайн аукцион савдолари орқали ижара ҳуқуқини сотишдан олинган маблағлар ижара ҳуқуқи давлат рўйхатидан ўтказилганидан кейин оператор хизмат ҳақи чегирилган ҳолда қуйидаги тартибда тақсимланади:
- 10 фоизи — Қишлоқ хўжалиги вазирлиги тизимидаги ташкилотларга (2 фоиз — «Агросаноатни рақамлаштириш маркази» МЧЖга, 3 фоиз — «Ўздаверлойиҳа» давлат илмий-лойиҳалаш институтига, 5 фоиз — Қишлоқ хўжалигини ривожлантириш ва озиқ-овқат таъминоти жамғармасига);
- базавий ҳисоблаш миқдорининг 1,5 баравари миқдорида — ер участкасига бўлган ҳуқуқни давлат рўйхатидан ўтказиш учун рўйхатдан ўтказувчи органнинг ҳисобварағига;
- қолган маблағлар — тегишли туман ёки шаҳар маҳаллий бюджетига тушади.
Фармон билан Қишлоқ хўжалиги вазирлигига Қорақалпоғистон Вазирлар Кенгаши, вилоятлар ҳокимлари, Кадастр агентлиги ва Давлат активларини бошқариш агентлиги билан биргаликда март ойигача 15 минг 626,8 гектар қишлоқ хўжалигига мўлжалланган ер участкасини электрон онлайн аукцион савдоларига чиқариш топширилди. Бунда жараённи аҳоли пунктларига яқин, сув таъминоти яхши, унумдорлиги юқори бўлган, майдони, қоида тариқасида, 5 гектардан юқори контурларни 1 гектаргача лотларга бўлган ҳолда амалга ошириш керак.
1 мартдан бошлаб очиқ электрон танловга чиқарилган ва ғолиб аниқланмаган қишлоқ хўжалигига мўлжалланган ер участкалари автоматик тарзда электрон онлайн аукционларга чиқарилади.
2021 йил июнь ойида президент ерга бўлган ҳуқуқларни бозор активига айлантириш тўғрисидаги фармонни имзолаганди. Ҳужжат билан ҳокимликларга ер участкаларини тўғридан-тўғри ажратиш, захиралаш, ободонлаштириш учун бериш ва ҳоказолар тақиқланган. Ерга бўлган ҳуқуқларнинг турлари 6 тадан 3 тага қисқартирилган. Ер участкалари хусусий секторга мулк ва ижара асосида, давлат ташкилотларига эса доимий фойдаланиш ҳуқуқи асосида берилиши белгиланган.
